काठमाडौं । अखिल नेपाल फुटबल संघ (एन्फा) ले दशरथ रंगशालाको मैदान बनाउने कामको सुरु गरेको छ ।
एन्फाले सोमबारबाट पुननिर्माण भईरहेको नेपालको एक मात्रै अन्तराष्ट्रिय स्तरको दशरथ रंगशालाको मैदान बनाउने काम सुरु गरेको हो ।
राष्ट्रिय खेलकुद परिषद (राखेप) ले मैदान बनाउने जिम्मा दिएपछि एन्फाले सोमबारबाट रंगशालाको घाँस काट्ने कार्य सुरु गरेको छ । एन्फाले एक साता भित्र मैदानको घाँस काटेर नयाँ दुबो रोप्ने योजना बनाएको छ ।
रंगशालाको निरिक्षण गर्न सोमबार त्रिपुरेश्वर पुगेका एन्फा अध्यक्ष कर्मा छिरिङ शेर्पाले पहिलो चरणमा घाँस काट्ने काम सुरु भएको र क्रमिक रुपमा मैदान निर्माणको काम अघि बढ्ने बताए ।
‘हामीले आजबाट घाँस काट्न सुरु गर्यौं । अब एक हप्ता जति घाँस काट्न समय लाग्छ । घाँस काटीसकेपछि यहाँको स्थिति हेरेर काम अगाडि बढाउँछौं,’ एन्फा अध्यक्ष शेर्पाले भने ।
एन्फा अध्यक्ष शेर्पा राखेपका सदस्य सचिव रमेश कुमार सिलवालसँगै मैदानको निरिक्षण गर्न रंगशाला पुगेका थिए ।
नेपालमा आयोजना हुने १३ औं दक्षिण एसियाली खेलकुद (साग) र फिफा विश्वकप छनोट अन्तर्गतको नेपालको होम खेललाई लक्षित गरेर राखेपले रंगशालाको निर्माण कार्य द्रुत गतिमा अघि बढाएको छ ।
रंगशाला निर्माणको ढिलाईकै कारण कतारमा आयोजना हुने फिफा विश्वकपको दोस्रो चरणको छनोट अन्तर्गत कुवेतसँग तय भएको होम गेम नेपालले कुवेतमै खेल्दैछ ।
बिस २०७२ सालमा गएको विनासकारी भुकम्पले जीर्ण बनेको रंगशाला नेपालको र चिनियाँ कम्पनिले बनाईरहेको छ ।
रंगशालाको सामान्य पारापिटतर्फ छाना हाल्ने काम सकिएको छ । यस्तै स्क्रिन बोर्ड र रंगशालामा रहेको एथलेटिक्सका लागि सेन्थेटिक ट्रयाक हाल्ने काम समेत सकिएको छ ।
अब मैदानको भीआईपी पारापिटको छाना र सिट राख्ने काम बाँकी रहेको छ । यस्तै साउण्ड सिष्टमको पनि काम बाकी रहेको छ ।
नेपालले आगामी मंसिर १५ देखि २४ सम्म आयोजना हुने १३ औं सागको उद्घाटन र समापन दशरथ रंगशालामा गर्ने योजना बनाएको छ ।
