पारापिटको अवस्था बुझ्न चीन उडे सदस्य सचिव

काठमाडौं । राष्ट्रिय खेलकुद परिषद् (राखेप)का सदस्य रमेश सिलवाल चीन उडेका छन् । दशरथ रंगशालामा जडान गरिने पारापिटको अवस्था बुझ्न सदस्य सचिव सिलवाल चीन उडेका हुन् ।

मंगलबार मध्यान्न चीन उडेका सदस्य सचिव सिलावलले चीनमा रहदाँ रंगशालाको भीआईपीतर्फ राखिने पारापिटको बन्दै गरेको छानोको अवस्था बुझ्ने छन् ।

साधारणतर्फको पारापिटको जडान कार्य सम्पन्न भएपनि भीआईपीतर्फको पारापिटको काम अघि बढ्न सकेको छैन । पारापिट जडानका लागि चीन र नेपालका दुई कम्पनीले जिम्मा पाएका छन् ।

चीनियाँ कम्पनी सीएनई र नेपाली कम्पनी एचटीसीले भीआईपीतर्फको पारापिट नेपाल ल्याउने जिम्मेवारी पाएका थिए । पारापिट जडानको जिम्मेवारी भने अर्को नेपाली कम्पनीले पाएको छ ।

‘सदस्य सचिव चीनमा रहदाँ पारापिटको छानोको निर्माण प्रक्रिया, नेपाल आईपुग्न लाग्ने समय र गुणस्तरको बिषयमा जानकारी लिनुहुनेछ ।’ सदस्य सचिवको सचिवालयका एक अधिकारीले भने ।

चीनमा रहदाँ सदस्य सचिवले आसन्न सागलाई लक्षित गर्दै चीनियाँ पक्षसंग नेपाली खेलाडीको प्रशिक्षणको व्यवस्था मिलाउन समेत आग्रह गर्नेछन् । सदस्य सचिव सिलवालले पदकको आश गरिएका केही खेललाई चीनमा विशेष प्रशिक्षण गराउने तयारी तयारी गरेका छन् । सोही अनुसार सम्भावित खेलको प्रशिक्षणको बिषयमा उनले चीनियाँ पक्षसंग छलफल गर्नेछन् ।

सदस्य सचिव ५ दिनका लागि चीन गएका हुन् । आवश्यकताका आधारमा भ्रमणको समय थपघट हुन सक्ने राखेपले जनाएको छ ।

राखेपले कात्तिक १५ भित्र दशरथ रंगशालाभित्रका निर्माणको सम्पुर्ण कार्य सक्न सम्बन्धित ठेकेदार कम्पनीलाई निर्देशन दिएको छ । सोही अनुसार पारापिट जडानको कार्यक्रम समेत कात्तिक १५ अगावै सक्नुपर्नेछ ।

दक्षिण एसियाली खेलकुद प्रतियोगिता (साग)को १३ औ संस्करण मंसिर १५ देखि २५ सम्म काठमाडौंमा आयोजना हुदैछ ।

गुरुङ निमिक्त सदस्य सचिव

सिलवाल चीन उडेपछि राजेश गुरुङले निमिक्त सदस्य सचिवको जिम्मेवारी पाएका छन् । सिलवालले गुरुङलाई निमिक्त सदस्य सचिवलको जिम्मेवारी दिएका हुन् ।
आफु अनुपस्थित रहेको अवस्थामा राखेपकै बोर्ड सदस्यमध्य एक जनालाई निमिक्तको जिम्मेवारी दिन सकिने प्रावधान रहेको छ ।