संगिता र संजु उत्कृष्ट लिफ्टर

काठमाडौं । नेपाल स्टङ्गेष्ट तेश्रो सुनिललाल जोशी स्मृती भारोत्तोलन प्रतियोगितामा महिलातर्फ बेष्ट लिफ्टरमा सिनियरतर्फ पुलिसकी संगिता राई र जुनियरतर्फ पुलिसकै संजु चौधरी भएका छन् ।

उनीहरुले ट्रफी प्रमाण पत्र तथा नयाँ राष्ट्रिय किर्तिमान बनाउने खेलाडीले नगद १ हजार रुपैयाँ प्राप्त गरे ।

काठमाण्डौ जिल्ला भारोत्तोलन संघले आयोजना गरेको प्रतियोगितामा पुलिसकी तारादेवी पुनले दोश्रो दिन क्लिन एण्ड जर्क तर्फ राष्ट्रिय कीर्तिमान कायम गरिन् । उनले आठौ राष्ट्रिय खेलकुदमा राखेको ९७ केजीमा सुधार गर्दै ९८ केजीका साथ कीर्तिमान बनाएकी हुन् ।

सिनियर ७६ केजी तौलमा खेलेकी पुनले स्नाचमा ७२ केजी र कुलमा १७० केजीका साथ स्वर्ण हात पारिन् । दोश्रो स्थानमा रहेकी एपिएफकी जयन्ती श्रेष्ठले स्नाचमा ५५ केजी र क्लिन एण्ड जर्कमा ६० केजी गरि कुल ११५ केजी भार बहन गरिन् । तेश्रो स्थानमा दाङ्गकी कल्पना चौधरी रहिन् । उनले स्नाचमा ४० केजी र क्लिनमा ५० गरि कुल ९० केजी भार बहन गरिन् ।

यस्तै ८१ केजी तौलमा पुलिसकी लक्ष्मी बनले तीन राष्ट्रिय कीर्तिमान राखिन् । उनले आठौ राष्टिय खेलकुदमा राखेको आफ्नै कीर्तिमानमा सुधार गरेकी हुन् । बनले स्नाचमा ६५ केजी र क्लिनमा ८३ केजी गरि कुल १४८ केजी भार बहन गर्दै तीनै विधामा किर्तिमान बनाएकी हुन् ।

यसअघि उनको नाममा ६४, ८२ र कुल १८६ केजीको रेकर्ड थियो । सेनाकी मनकुमारी कुमालले स्नाचमा ५८ र क्लिनमा ६५ गरि कुल १२३ केजीका साथ रजत पाईन् ।

सिनियरकै ८७ केजी तौलमा पुलिसकी बिद्या राईले क्लिन एण्ड जर्कमा ७६ केजीका साथ नयाँ कीर्तिमान कायम गरिन् । उनले आफ्नै ७५ केजीको किर्तिमानमा सुधार गरेकी हुन् ।

उदयपुरकी कान्ता भुजेलले स्नाचमा ३५ र क्लिनमा ४५ गरि कुलमा ८० केजीका साथ रजत पाईन् ।

८७ केजी माथीको तौलमा नेपाली सेनाकी अस्मिता राईले स्नाचमा ५८, क्लिनमा ७० गरि कुल १२८ केजी भारका साथ तीनै विधामा कीर्तिमान राखिन् । पुलिसकी सुधा थापाले स्नाचमा ५३ क्लिनमा ६७ गरि कुलमा १२० केजीका साथ रजत पाईन् । सिराहाकी मनिता चौधरीले कास्य पाईन् । उनले स्नाचमा ४२, क्लिनमा ६० र कुलमा १०२ केजी भार बहन गरिन् ।

पुरुषको ६७ केजी जुनियरमा पुलिसका प्रकाश केसीले स्नाचमा १०६ केजी र क्लिन एण्ड जर्कमा १२५ गरि कुल २३१ भारका साथ तीन बिधामा राष्ट्रिय कीर्तिमान बनाए । उनले आठौ राष्ट्रिय खेलकुदमा १०३, १२२ र २२५ केजीको किर्तिमान राखेका थिए ।

निरज गुप्ताले ७०, ९० र १६० केजीका साथ रजत तथा कास्कीका किरण घर्तीमगरले ६०, ७१ र कुल १३१ केजीका साथ कास्य पाए ।

सिनियरतर्फ सेनाका जीवन तामाङ्गले स्नाचमा ८३ केजी, स्नाचमा १०८ गरि कुल १९१ केजीका साथ स्वर्ण, सेनाकै संतोष थपलियाले ८३, १०७ र १९० केजीका साथ रजत तथा कास्कीका धन बहादुर झाक्री मगरले ८५, ९८ र १८३ केजीक साथ रजत पाए ।

पुरुषको ७३ केजी जुनियरमा बिरगंज युनाईटेडका सजरुद्धिन आलमले स्नाचमा ७३ क्लिनमा ५२ र कुलमा १६५ केजीका साथ स्वर्ण, एपिएफका सुलभ बस्नेतले ७३, ८२ र कुल ८२ केजीका साथ रजत तथा बिरगंज युनाईटेडका सुनिल कुमार सर्राफले ३५, ४५ र कुल ८० केजीका साथ काँस्य पाए ।

सिनियरतर्फ सेनाका यज्ञ बहादुर सारुले स्नाचमा ९८, क्लिनमा १२७ र कुलमा २२५ केजीका साथ स्वर्ण हात पारे । सेनाकै हेम नारायण श्रेष्ठले ८७, १०७ र १९४ केजीका साथ रजत तथा धनुषाका सरोज यादवले ६५, ८६ र १५१ केजीका साथ काँस्य पाए ।

पुरुष ८१ केजी तौलमा नेपाल पुलिसका विकाश थापाले तीन कीर्तिमान राखे । उनले स्नाचमा १२० केजीका साथ राष्ट्रिय किर्तिमान राखे । उनले आफैले आठौ राष्ट्रिय प्रतियोगितामा राखेको ११५ केजीमा ५ केजीले सुधार गर्दै किर्तिमान राखेका हुन् ।

दोश्रो स्थानमा रहेका एपिएफका महेश चौधरीले १०५ केजी स्नाच, १३० केजी क्लिन र २३५ केजीका साथ रजत तथा एपिएफकै सन्तोष चौधरीले ९० स्नाच, १२१ क्लिन र कुल २११ केजीका साथ कास्य पाए ।

जुनियरतर्फ बाँकेका सुरज बैश्यले स्नाचमा ८०, क्लिनमा १०१ गरि कुल १८१ केजीका साथ स्वर्ण जिते । कञ्चनपुरका विकाश भट्टले ७०, ९२ र १६२ केजीका साथ रजत तथा संजय यादवले ५५, ८३ र कुल १३८ का साथ कास्य पाए ।

८९ केजी तौलमा सेनाका दिनेश कार्कीले आफ्नै नाममा रहेको किर्तिमानमा सुधार गर्दै दुई राष्ट्रिय किर्तिमान बनाए । उनले आठौमा राखेको क्लिन एण्ड जर्कमा १३२ मा सुधार गर्दै १३५ केजी उचाल्दै कुलमा पनि २३० केजीलाई बढाउँदै २४० केजीका साथ दुई किर्तिमान राखेका हुन् ।

दोश्रो स्थानमा रहेका पुलिसका ओम प्रकाश बैश्यले स्नाचमा १०५ केजी भारका साथ किर्तिमान बनाए । तेश्रो स्थानमा रहेका एपिएफका तिलक बहादुर थापाले स्नाचमा ९०, क्लिनमा १२५ र कुल २१५ भार बहन गरे ।

प्रतियोगितामा सिनियर महिला तथा पुरुष तथा जुनियर महिला तथा पुरुष गरि ४० तौल समूहमा ४० स्वर्ण पदकका लागि खेलाडीले प्रतिस्पर्धा गरेका थिए ।
प्रतियोगितामा तीन विभागिय टोली र जिल्ला तथा क्लबका करिव ९० खेलाडीले प्रतिस्पर्धा गर्ने छन् ।