रारा अल्ट्रा म्याराथनमा दुर्ग र सुनमाया च्याम्पियन

जुम्ला । दुर्ग बहादुर बुढा र सुनमाया बुढाले जुम्ला रारा अल्ट्रा म्याराथनको उपाधि जितेका छन् । दुर्गले पुरुष र सुनमायाले महिलातर्फको उपाधि जितेका हुन्  ।

जुम्ला सदरमुकामबाट सुरु भई रारा तालसम्मको अल्ट्रा दौडमा जुम्लाका दुर्गले ५ घण्टा १९ मिनेट ४९ सेकेन्डमा दौड पुरा गर्दै उपाधि जिते ।  ५ घण्टा २८ मिनेट ३२ सकेन्डको समय निकालेका जुम्लाका धिर बुढाले दोस्रो स्थान हात पारे । जुम्लाकै धिरेन्द्र भण्डारीले ५ घण्टा ३२ मिनेट ४१ सेकेन्डको समयसहित तेस्रो स्थान हासिल गरे ।

महिलातर्फको उपाधि जित्ने क्रममा सुनमायाले ६ घण्टा ३४ मिनेट ४० सकेन्डको समय निकालिन । महिलातर्फ राममाया बुढाले ६ घण्टा ५९ मिनेट ४३ सकेन्डमा दौड पुरा गर्दै दोस्रो स्थान हात पारिन् । यस्तै हिमाली रावतले ७ घण्टा १० मिनेट १७ सेकेन्डको समय निकालिन ।

महिला तथा पुरुषतर्फको बिजेता, उपविजेता र तेस्रो हुने टोलीले क्रमस ५० हजार, ३० हजार र २० हजार प्राप्त गरे । यस्तै शीर्ष १० भित्र परेका खेलाडीले समान २-२ हजार प्राप्त गरे ।

कर्णालीमा पहिलो पटक आयोजना भएको अल्ट्रा म्याराथनमा ३२० खेलाडीको सहभागिता रहेको थियो । जसमा २५ जना महिला खेलाडी रहेका थिए । दौड जुम्ला सदरमुकाम देखी सुरु भएर जुम्लाबजार, डाँफलेक,खाली, न्याउरीघाट,चौथा,चार हजार सत्र मिटर चुचेमारा,मिलीचौर हुदै हुटु र रारा ताल पुगेर सकिएको थियो ।