पारस आउट भए मध्यक्रम कसले सम्हाल्ने ?

काठमाडौ । ‘पछिल्ला ३–४ बर्षमा थुप्रै खेलाडी ओपनिङमा परिक्षण भए । ओपनिङ खाली भयो, फलानोलाई परिक्षण गरौ भन्ने हेतुले प्रयोग गरियो । तर ओपनरनै भनेरै कसैलाई ल्याईएन ।’

सुवास खकुरेलको यो भनाईले राष्ट्रिय क्रिकेट टिममा देखिएको ओपनिङको धेरै समस्याको उजागड गर्छ । उनी आफैपनि राष्ट्रिय टिमका ओपनर हुन् । भरपर्दा ओपनरको रुपमा चिनिएका उनी पछिल्लो समय चोटका कारण मैदान बाहिर छन् ।

गत साता भएको मलेसिया भ्रमणको पहिलो टी–ट्वान्टी खेलमा कप्तान पारस खड्काले प्रदिप ऐरीसंग ओपनर जोडीको रुपमा मैदान उत्रिए । नेपाल ४ ओभर ३ बलमा २९ रनको स्थितीमा थियो । प्रदिप १७ बलमा ८ रन बनाउदै पोभिलियन फर्किएका थिए ।

खड्काले भने ५० बलमा अविजित ८६ रनको कीर्तिमानी अर्धशतकीय इनिङ्स खेल्दै नेपाललाई सहज जित दिलाएका थिए ।

दोस्रो खेलमा कप्तान पारस र पवन सरार्फले ओपनिङ गरे । उनीहरुले पहिलो विकेटका लागि ३४ रनको साझेदारी गरेका थिए ।

यस्तै सिंगापुरमा जारी आईसीसी टी–ट्वान्टी विश्वकप छनोट अन्तर्गतको एसिया फाइनलको पहिलो खेलमा ओपनिङका लागि पारस र ज्ञानेन्द्र मल्ल आएका थिए । कतारविरुद्द ४९ रनको ओपनिङ साझेदारी गर्दै टी–ट्वान्टी अन्तराष्ट्रियमा नेपालको सर्वाधिक ओपनिङ साझेदारीको कीर्तिमान बनाए ।

दोस्रो खेलमा पारस विश्राममा थिए । ज्ञानेन्द्र र प्रदीप ओपनरको रुपमा आए । दुवैले पहिलो विकेटका लागि ६६ रनको कीर्तिमान साझेदारी गरे ।

यसअघि नेपालले दिलिप नाथ, सुनील धमला, राजु रिजाल, अनिल शाह, पवन सर्राफ, प्रदिप ऐरी लगायतका खेलाडीलाई ओपनरको रुपमा प्रयोग गरिसकेको छ । तर अधिकांश खेलाडी प्रभाब देखाउन असफल रहेको ईतिहास छ ।

नेपालले अहिलेसम्म जति खेलाडीलाई ओपनरको रुपमा प्रयोग गर्यो, ती सबै ओपनिङ खाली रहेको अवस्थामा मौका पाएको सुवासको बुझाई छ ।

‘हामीले ओपनर भनेर कसैलाई मौका दिएनौं । ओपनिङ खाली देखिएपछि मात्र खेलाडीलाई कोशिश गरियो ।’ सुवास भन्छन्, ’ज्ञानु (ज्ञानेन्द्र मल्ल) को खेल बिग्रनुको एक कारण पनि यही हो । लामो समय टप अर्डरमा खेल्ने खेलाडीलाई ओपनिङमा ल्याउँदा खेल्न गाह्रो हुन्छ ।’

एक दुई महिनाको अभ्यासले कुनै खेलाडी ओपनिङमा भिज्न नसकिने सुवासको भनाई छ ।

‘ओपनिङ ब्याटिङ गर्ने खेलाडीमा फास्ट बल खेल्न सक्ने क्षमता हुनु पर्छ ।’ उनले थपे, ‘मध्य क्रमका खेलाडी सिधै ओपनिङ गर्न आउँदा बलको कारण पनि असहज हुन्छ । पुरानो बल र नयाँ बलले फरक फरक ब्यवहार देखाउँछ ।’

पछिल्लो समय कप्तान पारस स्वयम ओपनिङमा देखिएका छन् । त्यसको प्रभाव टिममा समेत देखिएको छ ।

‘पारस आफै ओपनिङमा आउनुलाई दुई फरक रुपमा लिएको छु । राम्रो पक्ष भनेको पारस अनुभबी खेलाडी हुन् र आक्रामक ब्याट्सम्यान भएका कारण ‘पावर प्ले’मा सुरुवात राम्रो दिलाउन सक्छन् । तर दुर्भाग्यवस पारस चाँडै आउट हुन पुगे भने मध्यक्रम कसले सम्हाल्ने ? जस्तो भएनी अनुभबी खेलाडीको कमी पक्कै हुनेछ ।’ उनले भने ।

त्यसो भए ओपनिङ जोडी तयार गर्न के गर्नु पर्छ ?

‘हाम्रो अभ्यासनै पुगेको हुँदैन । हामीले अभ्यासमा दिनको धेरैमा १–२ वटा नयाँ बल प्रयोग गर्छौं । सायद त्यो निकै कम हो । कम्तिमा पनि १० वटा नयाँ बलले अभ्यास गर्दा ओपनिङ गर्ने खेलाडीमा ओपनरलाई सजिलो हुन्छ । पुरानो बल र नयाँ बल फरक फरक प्रकृतिको हुन्छ ।’ उनले भने ।

‘दिनको १–२ वटा बल खेलेको ओपनरले अन्तराष्ट्रिय स्तरमा शतक अर्धशतक प्रहार गर्छन् भनेर आश गर्नु पनि हुदैन ।’ उनले थपे ।

नयाँ बलसंगै अभ्यासमा पनि फरक पन ल्याउनुपर्ने सुवासको सुझाब छ । नेपालका फास्ट बलर भन्दा विदेशी बलरको गति तिब्र रहेका कारण बललाई भिजाएर, रबर बल जस्ता तरिका अपनाउँदै अभ्यास गर्न आवश्यक रहेको उनी बताउँछन् ।

नेपालको पिच स्लो र विदेशी पिच फास्ट हुने भएका कारण नेपाली पिचमा पनि परिवर्तन आवश्यक रहेको सुवासलाई भनाई छ ।

अहिले उनी खुट्टाको चोटका कारण मैदान बाहिर रहेका छन् ।

‘हातमा लागेको चोट निको भएपछि अभ्यासमा फर्किएको थिए । फेरी खुट्टामा चोट लाग्यो ।’ सुवास भन्छन् ।

‘चोट लागेरै सकिने भयो जिन्दागी ।’ सुवास मुस्कुराउँछन् ।

उनले सन् २०१४ को विश्व टी–ट्वान्टीमा नेपालका लागि ओपनिङ गर्दै कीर्तिमान बनाएका थिए । अफगानिस्तानविरुद्द ५३ बलमा ५६ रन प्रहार गर्दै उनी टी–ट्वान्टी अन्तराष्ट्रिय क्रिकेटमा अर्धशतक प्रहार गर्ने पहिलो नेपाली खेलाडी बनेका थिए ।

सुवासले ८ टी ट्वान्टी अन्तराष्ट्रियमा १ सय १२ रन प्रहार गरेका छन् । सन् २०१५ मा हङकङविरुद्दको टी–ट्वान्टी अन्तराष्ट्रियपछि उनी खेलेका छैनन् ।

अन्तिम पटक नेपालका लागि उनले सन् २०१८ मा हङकङविरुद्द एसिया कप छनोट खेलेका थिए । उनी टिममा नपर्नुको मुख्य कारण चोट हो । सोही कारण उनी लामो समययता मैदान बाहिर बस्दै आएका छन् ।