कात्तिक १५ अघिनै पोखरा रंगशाला तयार गर्न निर्देशन

काठमाडौं । राष्ट्रिय खेलकुद परिषद्का सदस्य सचिव रमेश सिलवालले कात्तिक १५ गते अघिनै पोखरा रंगशाला निर्माण कार्य सक्ने गरि काम गर्न निर्देशन दिएका छन् ।

कास्कीमा निर्माणाधिक खेलकुद पुर्वाधारको निरिक्षण गर्न शुक्रबार पोखरा पुगेका सदस्य सचिव सिलवालले कात्तिकको दोस्रो साता अघिनै रंगशालाको सबै निर्माण कार्य सक्ने गरि काम अघि बढाउन निर्देशन दिएका हुन् ।

नेपालमा हुने १३ औ दक्षिण एसियाली खेलकुद प्रतियोगिता साग मंसिर १५ गतेबाट २५ गतेसम्म आयोजना हुदैछ ।

सदस्य सचिव सिलवालले प्रतियोगिता सुरु हुन एक महिना अघिनै निर्माणको काम सक्न ठेकेदार कम्पनीका प्रतिनिधिलाई निर्देशन दिएका हुन् ।

‘धेरै चुनौतीका साथ साग सम्पन्न गर्ने जिम्मेवारी लिएको छु । कार्यतालिका बनाएर रंगशाला निर्माणको काम सक्नुहोस ।’ उनले भने, ‘निर्धारित समयमा सम्पन्न गरेमा पुरस्कृत र नसकेमा दण्डित गर्नेछु ।’

ठेकेदार कम्पनीले अहिले पोखरा रंगशालाको जग हाल्ने काम गरिरहेका छन् । जग हाल्ने काम सकिएपछि जर्मनबाट ल्याईने ‘रेडिमेट प्यारापिट’ जडान गरिनेछ ।

यसअघि नेपालगञ्ज रगशामा समेत ‘रेडिमेट प्यारापिट’ जडान गरिएको थियो । तर सो ‘प्यारापिट’ चीनबाट ल्याईएको थियो ।

सागको खेलकुद पुर्वाधार गर्न पोखरा पुगेका सदस्य सचिव सिलवालले मुख्य मन्त्री पृथ्वीशुब्बा गुरुङ सहित महानगरका मेयर र समाजिक सुरक्षा मन्त्रीसंग समेत भेटघाट गरेका थिए ।

उनले प्रदेशले विनियोजन गर्ने बजेट निर्माणमा खेलकुद पुर्वाधारलाई प्राथमिकतामा राख्न अनुरोध गर्दै परिषद सहकार्य गरेर अघि बढ्न ईच्छुक रहेको बताएका थिए ।

भेटमा मुख्यमन्त्री गुरुङले राखेपसंग सहकार्य गरेर खेलकुद विकासमा लगानी गर्न प्रदेश सरकार तयार रहेको बताएका थिए ।

आगामी मंसिरमा हुने साग अन्तर्गत पोखरामा ७ खेलका विभिन्न स्पर्धाहरु सञ्चालन गर्ने सरकारको तयारी छ ।