पोखरा क्रिकेट मैदानलाई प्रदेश सरकारको २ करोड

काठमाडौं । गण्डकी प्रदेश सरकारले पोखरा क्रिकेट मैदानको मर्मत सम्भारका लागि २ करोड रुपैयाँ दिने भएको छ ।

पहिलो संस्करणको पोखरा प्रिमियर लिग पीपीएलको सफल आयोजना पछि चर्चामा आएको पोखरा क्रिकेट मैदानको निर्माणका लागि प्रदेश सरकारले दुई करोड रकम नयाँ आर्थिक बर्षलाई विनियोजन गरेको हो ।

पोखरामा फ्रेन्चाईज क्रिकेट लिग सञ्चालन भएपछि प्रदेश सरकारले पोखरा क्रिकेट रंगशाला निर्माणमा चासो राखेको थियो । सो क्रममा राष्ट्रिय क्रिकेट टिमका कप्तान पारस खड्का सहितको टोलीले पोखरालाई अन्तराष्ट्रिय क्रिकेट रंगशालाको रुपमा विकास गर्न पेभिलियन लगायतको पुर्वाधार निर्माणमा लगानी गर्न प्रदेश सरकारलाई आग्रह गरेको थियो ।

‘पीपीएलको पोखरामा सफल आयोजना पछि प्रदेश सरकारले क्रिकेट मैदान निर्माणमा सहयोग गर्ने मनसाय देखाएको थियो । सोही अनुसार पेभिलियन लगायतका पुर्वाधार निर्माणमा नयाँ आर्थिक बर्षमा प्रदेश सरकारले दुई करोड विनियोजन गरेको छ ।’ पीपीएलको आयोजक क्विन्स ईभेन्ट म्यानेजमेन्टका प्रबन्ध निर्देशक छुम्मी लामाले भने ।

‘प्रदेश सरकारले हामीसंग अपेक्षा साधेको थियो । सोही अनुसार हामीले मैदानको पुनर्निमाणमा लगानी गर्न जोड दिएका थियौ । प्रदेश सरकारले क्रिकेट रंगशालालाई अन्तराष्ट्रिय स्तरको बनाउन गम्भिर रहेको देखियो ।’ उनले थपे ।

प्रबन्ध निर्देशक लामा सहित राष्ट्रिय टिमका कप्तान खड्का, उपकप्तान ज्ञानेन्द्र मल्ल प्रदेश सरकारलाई भेट्न र मैदानको निरिक्षण गर्न बिहिबार पोखरा पुगेका थिए ।

सो क्रममा मुख्यमन्त्री पृथ्वी शुब्बा गुरुङ सहितको टिमले पोखरा रंगशालाको निरिक्षण गरेको थियो । मुख्यमन्त्री शुब्बाले पीपीएलको आयोजनाले क्रिकेट विकासमा नयाँ आयाम थपेको बताउँदै पोखरा क्रिकेट मैदानलाई अन्तराष्ट्रिय स्तरको बनाउन कुनै कसर बाँकी नराख्ने बताएका थिए ।

मैदान निरिक्षणमा गण्डकी प्रदेशका भौतिक योजना मन्त्री रामशरण बस्नेत र अर्थ विकास समितिका सभापति दिपक कोईराला समेत सहभागी थिए ।

सो क्रममा कप्तान पारस खड्काले अन्तराष्ट्रिय स्तरको क्रिकेट मैदान निर्माणमा पोविलियन महत्वपुर्ण हुने बताउँदै पुर्वाधार निर्माणमा बजेटको व्यवस्था गर्न प्रदेश सरकारसंग माग गरेका थिए ।

उनले क्रिकेट रंगशालाको निर्माणले अन्तराष्ट्रिय स्तरका खेल समेत पोखरामा आयोजना गर्न सकिने बताउँदै पुर्वाधारको काम अघि बढाउन प्रदेश सरकारसंग आग्रह गरेका थिए ।

मुख्य मन्त्री गुरुङले दोस्रो संस्करणको पीपीएल आयोजना अघिनै मैदान मर्मतको काम सम्पन्न गर्ने आश्वासन दिएका थिए ।