एपीएफ पीएम कपको फाइनलमा

काठमाडौं । एपीएफ क्लब कञ्चनपुरमा जारी प्रधानमन्त्री कप महिला टी-ट्वान्टी क्रिकेट प्रतियोगिताको फाइनलमा प्रवेश गरेको छ ।

कभर्डहल क्रिकेट मैदानमा मंगलबार भएको दोस्रो सेमिफाइनलमा प्रदेश १ लाई ४ रनले पराजित गर्दै एपीएफ उपाधि नजिक पुगेको हो ।

वर्षाको कारण ५ ओभरमा झारिएको खेलमा एपीएफले दिएको ४६ रनको लक्ष्यमा पछाएको प्रदेश १ ले ५ ओभरमा ५ विकेट गुमाएर ४१ रन मात्रै बनाउन सक्यो ।

 

प्रदेश १ का लागी कप्तान रुबिना क्षेत्रिले १२ रन बनाउनु बाहेक अन्य खेलाडीले दोहोरो अंकमा रन जोड्न सकेनन् ।

 

यसअघि पहिले ब्याटिङ गरेको एपीएफले वर्षाले खेल रोकिनु अघि ८ ओभरमा ४८ जोडेर १ विकेट गुमाएको थियो । 

 

उसका लागि ज्योति पाण्डेले सर्वाधिक २३ तथा कप्तान सीता राना मगरले अविजित २० रन बनाएकी थिईन् । त्यसपछि डिएल पद्दतिको आधारमा प्रदेश नम्बर १ ले पाँच ओभर ४६ रनको नयाँ लक्ष्य पाएको थियो ।

 

अब फाइनलमा एपीएफले सुदुरपश्चिम प्रदेशसँग खेल्नेछ ।

 

महाकाली स्पोर्ट्स सोसाइटीको आयोजनामा जारी प्रतियोगिताको विजेताले ५ लाख र उपविजेताले ३ लाख पाउने छन् । प्रतियोगिताको सर्वोत्कृष्ट खेलाडीले ३० हजार पाउने छन् ।