विश्वकप क्रिकेटका बिर्सन नसकिने खेलहरु

एजेन्सी । सन् १९७५ बाट सुरु भएको आईसीसी विश्वकप क्रिकेटले १२ औं संस्करण बिहिबारबाट सुरु हुँदैछ ।

क्रिकेटको कुम्भमेला विश्वकप इंग्ल्यान्ड र वेल्समा हुनेछ । जसमा विभिन्न १० राष्ट्रले प्रतिस्पर्धा गर्नेछन् ।

विश्वकपका लागि सहभागी सबै टोलीले अन्तिम तयारी गरिरहेका छन् । सहभागी सबै टोली उपाधि उचाल्ने लक्ष्यसहित इंग्ल्याण्ड पुगिसकेका छन् ।

यस संस्करणको विश्वकपमा उत्कृष्ट खेलहरु देखिने अनुमान गरिएको छ । किनकी अघिल्लो संस्करणमा पनि केहि उत्कृष्ट खेलहरु भएको थियो ।

अन्तराष्ट्रिय क्रिकेट परिषद (आईसीसी) ले अघिल्ला विश्वकपमा भएका उत्कृष्ट खेलहरुको सूची तयार गरेको छ । जुन १० खेलहरु यस प्रकार रहेका छन् ।

अष्ट्रेलियाविरुद्ध दक्षिण अफ्रिका - सन् १९९९ सेमिफाइनल

अन्तिम ओभरमा ९ रन आवश्यक । लाग्दै थियो दक्षिण अफ्रिकाले फाइनल यात्रा गर्नेछ तर सोचे अनुरुप नतिजा निस्केन ।

सौन पोलकले ३६ रन खर्चेर ५ विकेट हात पारेपछि अष्ट्रेलियाले २ सय १३ रनमा रोकियो । जोण्टी रोड्स र ज्याक कालिसले अफ्रिकाको इनिङस सम्हालेको खेलमा अन्तिम रन आवश्यक रहेको बेला मात्र एक विकेट बाँकी रहयो ।

लेन्स क्लुन्सेरले बललाई मिडअफतर्फ धकेली दिए । तर, एलन डोनाल्डले चाँडो रन लिन गरेको आह्वान नसुन्दा उनी रन आउट हुन पुगे र खेल अष्ट्रेलियाको पक्षमा गयो ।

इंगल्याण्डविरुद्ध आयरल्याण्ड - सन् २०११

विश्वकप इतिहासमा कुनै पनि थ्रिलर खेल सम्झदा केभिन ओ ब्राइनको नाम मानसपटल आउँछ । पहिलो इनिङसमा इंगल्याण्डले ८ विकेटको क्षतिमा ३ सय २७ रन बनाउन सफल भयो । इंगल्याण्डले दिएको यति ठुलो लक्ष्य कुनै राष्ट्रले भेट्टाउन सकेको थिएन ।

मात्र १ सय ६ रनमा ४ विकेट गुमाएको आयरल्याण्डको खेल सम्हाल्न केभिन मैदान प्रवेश गरे । अघिल्लो ९ खेलमा अर्धशतक समेत बनाउन नसकेका उनले सो खेलमा १३ चौका र ६ छक्का प्रहार गर्दै मात्र ६३ बलमा शतक प्रहार गरे । विश्वकपमा छिटो शतक प्रहार गर्ने खेलाडी बनेका उनले टेस्ट राष्ट्र माथि एतिहासिक जित समेत दिलाउन सफल रहे ।

भारतविरुद्ध इंगल्याण्ड - सन् २०११

खेलमा रोमाञ्चक त तब हुन्छ जब दुवै टिमले खेल जित्न सक्दैनन् । सन् २०११ मा भएको विश्वकपमा घरेलु टोली भारतविरुद्ध इंगल्याण्डले बराबरी खेल्यो ।

टस जितेर ब्याटिङ गरको भारतले सचिन तेन्दुलकरको शतकीय इनिङ्समा ३ सय ३९ रनको लक्ष्य प्रस्तुत गर्यो । जवाफी ब्याटिङ गरेको इंगल्याण्डलाई २ विकेट बाँकी रहँदा अन्तिम ओभरमा १४ रन आवश्यक पर्यो । तर, इंग्ल्याण्डका खेलाडीले १३ रन मात्र बनाउन सक्दा खेल बराबरीमा सकियो ।

भारतविरुद्ध जिम्बाबे - सन् १९८३

भारतले पहिलो विश्वकप जित्नुअघि, जिम्बाबेसंग उत्कृष्ट खेल प्रस्तुत गरेको थियो ।

प्रमुख ५ खेलाडीलाई मात्र १७ रनमा गुमाएको थियो । नाजुक स्थितिमा भारतलाई २४ बर्षे कप्तान कपिल देवले १ सय ७५ रनको इनिङस खेल्दै सम्मानजनक स्कोर खडा गरे । जिम्बाबेलाई भारतले २ सय ६७ रनको लक्ष्य प्रस्तुत गर्यो ।

बलिङमा मदन लाल र कपिल देवले निकै कसिलो बलिङ गर्दा भारतले खेल आफ्नो पक्षमा पार्यो । यस संस्करणको विश्वकप भारतले जितेको थियो ।

अस्ट्रेलियाविरुद्ध भारत - सन् १९८७

घरेलु भूमिमा भएको विश्वकपमा आफ्नो समर्थकको मन जित्ने सुनौलो अवसर भारतलाई थियो । पहिलो खेलमा जित निकाल्दै प्रतियोगितामा उत्कृष्ट सुरुवात गर्ने भारतको चाहनालाई अष्ट्रेलियाले निराश बनाईदिएको थियो ।

दर्शकले खचाखच भरिएको खेलमा जिओफ मार्सको १ सय १० रनको इनिङसमा भारतलाई २ सय ७० रनको लक्ष्य प्रस्तुत गर्यो । भारतका नबजोत सिंह सिद्धु र कृष्णमाचरी श्रीकान्तले बाहेक अन्य खेलाडीले सम्झन योग्य इनिङ्स खेल्न नसक्दा भारत १ रनले पराजित भयो ।

भारतविरुद्ध वेष्ट इण्डिज - सन् १९८३

३६ बर्ष अघि भएको विश्वकपको कम स्कोरको फाइनल खेल समर्थकका लागि निकै खास छ । अझ भारतीयका लागि । दुई पटकको विश्व विजेता वेष्ट इण्डिजले स्विङ बलिङको मद्दतमा भारतलाई स्तब्ध पारिदियो । उसका लागि एन्डी रोबर्ट्सले १० ओभरमा ३२ रन खर्चेर ३ विकेट हात पारेका थिए ।

तर, भारतले दिएको १ सय ८४ रनको सामान्य लक्ष्य पछ्याएको वेष्ट इण्डिज मात्र १ सय ४० रन बनाउँदा अलआउट हुन पुग्यो । उसले आफ्नो मुख्य खेलाडी सर भिभ रिचार्ड्सलाई ३३ रनमा गुमाएको थियो । र, दुई संस्करणमा २ उपाधि हात पारेको वेष्ट इण्डिजको उपाधि यात्रामा पुर्णबिराम लागेको थियो ।

अस्ट्रेलियाविरुद्ध वेष्ट इण्डिज - सन् १९९६

विश्व क्रिकेटमा राज गरिरहेको वेष्ट इण्डिजलाई पहिलो पटक अष्ट्रेलियाले पराजित गर्न सफल भएको थियो । अष्ट्रेलियाले ५ संस्करणमा ३ फाइनल खेलेको वेष्ट इण्डिजलाई सो बर्ष सेमिफाइनलमा रोक्न सफल भयो ।

वेष्ट इण्डिजका रिची रिचार्ड्सनले कसिलो बलिङ गर्दा अष्ट्रेलियाले १५ रनमा ४ विकेट गुमाएको थियो । तर, स्टुवार्ट ल र मिचेल बिभनको उत्कृष्ट इनिङ्समा अष्ट्रेलियाले २ सय ७ रन बनाउन सफल भयो ।

उत्कृष्ट सुरुवात गरेको वेष्ट इण्डिजले १ सय ६५ रन बनाउदा मात्र २ विकेट गुमाएको थियो । लगत्तै २९ रनको लागि वेष्ट इण्डिजले ७ विकेट गुमाएपछि अष्ट्रेलिया ९ बर्षपछि फाइनल पुग्न सफल भएको थियो ।

भारतबिरुद्ध पाकिस्तान - सन् २००३

भारत र पाकिस्तानको खेल सधैं रोमान्चक हुन्छ । सन् २००३ को विश्वकपमा साइद अनवरको शतकमा पाकिस्तानले २ सय ७३ रनको लक्ष्य प्रस्तुत गर्यो । सचिन तेन्दुलकरले पुन: एक पटक एकदिवसीयमा आफ्नो उत्कृष्ट इनिङस खेल्दै भारतलाई जित दिलाए ।

तर,सो खेललाई थुप्रै समर्थकले सोयब अख्तरको बलिङका कारण सम्झने गरेका छन् जसले सचिनलाई ९८ रनमा आउट गरेका थिए ।