'उपाधि रक्षा गर्न सक्षम छौं'

काठमाडौं । एसीसी यू-१६ पूर्वी क्षेत्रिय क्रिकेट प्रतियोगिताको उपाधि जित्ने लक्ष्यसहित नेपाली टोली आज थाइल्याण्ड प्रस्थान गर्दैछ ।

थाइल्याण्डको चियाङमाईमा शनिबारबाट सुरु हुने प्रतियोगिताका लागि १४ खेलाडीसहित १७ सदसीय नेपाली टोली आज अपरान्ह थाइल्याण्ड प्रस्थान गर्नेछन् ।  नेपाली टोलीलाई बिहिबार नै परराष्ट्रमन्त्री प्रदीप ज्ञवालीले विदाई गरे ।

साविकको विजेता समेत रहेको नेपालले प्रतियोगिताको उपाधि रक्षा गर्ने लक्ष्य बनाएको छ । अघिल्लो संकरणमा नेपालले सिंगापुरलाई ७१ रनले पराजित गर्दै उपाधि जितेको थियो  ।

थाइल्याण्ड प्रस्थान गर्नु अघि नेपाली टोलीका मुख्य प्रशिक्षक बसन्त शाहीले तयारी छोटो भएपनि आफ्नो टिम उपाधि रक्षा गर्न सक्षम रहेको बताए ।

‘गत वर्ष हामी च्याम्पियन बन्न सफल भएका थियौं । त्यसैले हामीलाई उपाधि रक्षा गर्नुपर्ने चुनौती छ,' प्रशिक्षक शाहीले भने, 'छोटो तयारी भएपनि टिम सन्तुलित बनेको छ ।  हामी उपाधि डिफेन्स गर्न सक्षम छौं ।'

यस्तै प्रशिक्षक शाहीले खेलाडीले छोटो समयमा निकै मेहेनत गरेको समेत बताए । उनले आफ्नो टोलीको ब्याटिङ र बलिङ दुवै पक्ष बलियो रहेको समेत बताए  । 

प्रतियोगिताका लागि नेपालले गत साता सम्पन्न यू–१६ क्रिकेट लिगबाट खेलाडी छनोट गरेको थियो । नेपालले बिशाल बिक्रम केसीको कप्तानीमा टोलीको घोषणा समेत गरिसकेको छ ।

पहिलो पटक नेपाली टोलीको कप्तानी सम्हालेका बिशालले प्रतियोगिता जित्न आफुहरु आत्मविश्वासका साथ खेल्ने बताए ।

'टिम राम्रो छ । उपाधि जित्न हामी सक्षम छौं । तर, हामी धेरै आत्मविश्वासी भने बन्ने छैनौं,' कप्तान बिशालले भने । 

नेपालले पहिलो खेलमा म्यानमारसंग प्रतिस्पर्धा गर्नेछ । समूह 'ए' मा रहेको नेपालले म्यानमारसंग शनिबार प्रतिस्पर्धा गर्नेछ ।

नेपालको समूहमा अन्य दुई टोली आयोजक थाइल्याण्ड र मलेसिया रहेको छ । नेपालले दोस्रो खेलमा खेलमा मलेसियासंग अप्रिल २४ र अन्तिम खेलमा आयोजक थाइल्याण्ड अप्रिल २५ मा खेल्नेछ ।

प्रतियोगिताको समूह 'बी' मा हङकङ, सिंगापुर, भुटान र चीन रहेका छन् ।