आगामी २८ माघमा एन्फा निर्वाचन, उपाध्यक्ष बैठक छाडेर निस्किए !

काठमाडौं। अखिल नेपाल फुटबल संघ (एन्फा) उपाध्यक्ष दीर्घबहादुर केसी ‘कुमार’ कार्यसमिति बैठक छाडेर हिँडेका छन्।

सातदोबाटोस्थित एन्फा कम्प्लेक्समा कार्यसमिति बैठक जारी छ। बैठकलले आगामी २८ माघमा नयाँ कार्यसमितिका लागि चुनाव गर्न निर्णय माइनोट गरेको छ।

यसैबारे असन्तुष्टि जनाउँदै केसी बैठक छाडेर हिँडेका हुन्। बैठकमा सहभागी एक सदस्यका अनुसार अर्ली इलेक्सनमा जाँदा फुटबलप्रति नकरात्मक सन्देश जाने भन्दै उनले आपत्ति जनाएका थिए।

‘उहाँले अर्ली इलेक्सनमा जाँदा राम्रो सन्देश नजाने कुरा उठाउनुभयो। यसले गर्दा फुटबलमा भन्दा पनि बाहिर पब्लिकसामु आफूहरू जबाफदेही हुनुपर्ने कुरा उठाउनु भएको थियो। तर, बहुमत सदस्यले चुनावको प्रस्ताव पारित गरेपछि उहाँ उठेर हिँड्नु भएको हो,’ ती सदस्यले खेलपाटीसँग भने।

एन्फा अध्यक्ष पंकजविक्रम नेम्वाङले साधारण सभासम्बन्धी अजेन्डा समेट्दै बुधबार एन्फा कार्यसमिति बैठक बोलाएका थिए।

बैठकमा साधारण सभा तथा निर्वाचनसम्बन्धी अजेन्डालाई मुख्य रूपमा समावेश गरिएको थियो।

एन्फाको वर्तमान कार्यसमितिको चार वर्षे कार्यकाल २०८३ साल असार ६ गते सकिँदैछ। एन्फा विधानअनुसार प्रतिकूल अवस्थामा अधिकतम ६ महिनासम्म कार्यकाल थप गर्न सकिने प्रावधान थियो।

नियमित निर्वाचन गर्ने समयमै सन् २०२६ को विश्वकप फुटबल आयोजना हुने भएकाले एन्फा माघ मै अर्ली इलेक्सनको बाटो रोजिएको हो।

जिल्ला र क्लब तहमा राम्रो पकड रहेको वर्तमान नेतृत्वले कुनै अध्यावधिक नगरी पुरानै सदस्यलाई समेट्दै चुनावमा होमिने निर्णय गरेको छ।

यद्यपि, पुन: एन्फामा फर्किने रणनीति साथ अर्ली इलेक्सन गर्न खोजेको आरोप पनि नेम्वाङ नेतृत्वमाथि थुप्रिँदै आइरहेको छ। अमेरिका, क्यानडा र मेक्सिकोमा आयोजना हुने विश्वकप फुटबलअघि चुनाव गर्दा त्यसको लाभ लिन सकिने अनुमान पनि गरिएको छ।