काठमाडौं। नेपाली राष्ट्रिय टोलीकी मिडफिल्डर प्रीति राईको गोलसँगै इत्तिहाद क्लबले एएफसी महिला च्याम्पियन्स लिग प्रारम्भिक चरणको अन्तिम खेलमा सानदार जित निकालेको छ।
हाङ जेबात रंगशाला आइतबार सम्पन्न समूह ‘सी’ को अन्तिम खेलमा केलना युनाइटेडलाई ४–० ले पराजित गरेको हो। तर, इत्तिहादले नकआउट चरणमा प्रवेश पाउने–नपाउने कुरा भने अन्य समूहहरूको नतिजापछि मात्रै पक्का हुनेछ। टोलीलाई उत्कृष्ट दोस्रो स्थान बन्ने सम्भावनामा अझै पर्खिनुपर्ने छ।
खेलमा इत्तिहादले बलमा स्पष्ट पकड जमायो। इउजेनीय टेटे र प्रीति राईले केलेनाको रक्षापंक्तिलाई निरन्तर दबाबमा राखे। २३औं मिनेटमा इनास अलजमाअिनले समयमै दिएको पासलाई रोउजबाहन फ्राइजले सदुपयोग गर्दै गोलकीपर नुर्दियाना रोस्टामलाई छक्याएर इत्तिहादलाई अग्रता दिलाइन्।
३१औं मिनेटमा भने इत्तिहादले दोस्रो गोल उपहारमै पायो। फ्राइजको क्रसलाई क्लियर गर्ने प्रयासमा केलेनाकी शलिका अरेलियाले आफ्नै पोस्टमा लगाइन्। ३४औं मिनेटमा प्रीतिले शक्तिशाली प्रहार गरे पनि बल साइड नेटमा लागेर फर्कियो।
६८औं मिनेटमा इत्तिहादको सहज आक्रमणको फलस्वरूप सिडालिया कुटाले दिएको क्रसलाई प्रीतिले बक्सभित्रैबाट भली गर्दै स्कोर ३–० बनाइन्।
८७औं मिनेटमा फेरि शलिकाले प्रीतिमाथि फाउल गर्दा इत्तिहादले पेनाल्टी पायो। स्पट किक लिन पुगेकी कुटाले सजिलै गोल गर्दै टोलीको जितलाई ४–० मा टुङ्ग्याइन्।
-1756657034.jpeg)
