काठमाडौं। सुरुआती अग्रता जोगाउन नसक्दा नेपालले भुटानसँग बराबरी खेल्दै साफ यु–१७ महिला च्याम्पियनसिप टुंगाएको छ।
भुटानको राजधानी थिम्पुस्थित चाङ्लिमिथाङ रंगशालामा आइतबार सम्पन्न अन्तिम खेलमा नेपालले घरेलु टोलीसँग १–१ को बराबरी खेलेको हो। योसँगै नेपाल तेस्रो हुन सफल भएको छ।
उपाधि जित्ने लक्ष्यसहित थिम्पु पुगेको नेपाल ६ खेलमा १ मात्रै जित हात पार्न सफल रह्यो। उक्त जित पनि नेपालले पहिलो लेगमा भुटानमाथि नै निकालेको थियो। उक्त खेलमा सहारा लिम्बूको सानदार दुई गोलसँगै नेपालले २–१ को पुनरागमन जित निकालेको थियो। सोही जित नै नेपाललाई तेस्रो बनाउन पर्याप्त बन्यो। नेपालले ६ खेलमा ४ अंक जोड्यो।
नेपालले उपाधि विजेता भारतसँग ७–० र ५–० को हार बेहोरेको थियो। बंगलादेशसँग भने ३–० र ४–१ को पराजय बेहोर्न पुग्यो। भुटान भने २ अंकसहित पुछारमा रह्यो। भुटानले बंगलादेशसँग पहिलो लेगमा ३–१ को हार बेहोरेको थियो। तर, दोस्रो लेगमा भने उक्त १–१ को बराबरी खेल्दै अंक हासिल मात्रै गरेन भारतलाई उपाधि नै दिलाइदियो। भारतसँथ भने ८–० र ५–० को फराकिलो हार बेहोर्यो।
आइतबार नेपालका लागि बबतिका कार्कीले गोल गरिन्। भुटानका लागि सोनम याङ्जेनले बराबरी गोल फर्काउँदै नेपाललाई प्रतियोगिता सुखद् तरिकाले अन्त्य गर्न दिइनन्।
खेलको १५औं मिनेटमै नेपालले सुरुआती अग्रता लिएको थियो। पेनाल्टी बक्सभित्र भुटानी डिफेन्डरसँग डिफ्लेक्ट भएर आएको बललाई कप्तान भूमिका बूढाथोकीले सुन्दर पास दिँदै गोलको अवसर सिर्जना गर्दिएकी थिइन्।
उक्त बलललाई अनमार्क रहेकी बबतिका कार्कीले फिनिसिङ गर्दै नेपाललाई १–० को अग्रता दिलाइन्। तर, भुटान पहिलो हाफको इन्जुरी समयमा खेलमा फर्कियो। कर्नरबाट आएको बललाई हुलमुलमा सोनम हलुका टच दिँदै बललाई जालीमा चुमाइन्।
-1756657034.jpeg)
