काठमाडौं। सातदोबाटोस्थित एन्फा कम्प्लेक्समा शुक्रबार बिहान तनावपूर्ण दृश्य देखियो। एन्फा यु–१६ युथ लिगका क्रममा संकटा क्लबका खेलाडी र अफिसियल खेल पूरा नहुँदै आफ्नो सामाना उठाए र खेलमैदान छाडेर हिँडे।
मैदानमा भने विपक्षी फ्रेन्ड्स क्लबका खेलाडी अचम्म मान्दै बसिरहेका छन्। यो कुनै सामान्य क्लबसँग जोडिएको विवाद होइन। यो त संकटा क्लबका अध्यक्ष इन्द्रमान तुलाधर र रेफ्रीसँग जोडिएको विवाद हो। इन्द्रमान स्वयं अखिल नेपाल फुटबल संघ (एन्फा) का प्रमुख कार्यकारी अधिकृत (सिइओ) हुन्।
उनी खेलमैदानसँगै जोडिएको कम्प्लेक्सको कुर्सीमा बसेर खेल व्यवस्थापन हेर्ने जिम्मेवारीमा छन्। तर, यही संस्थाको आधिकारिक लिगमा उनले नेतृत्व गरेको क्लबले नै रेफ्रीप्रति असन्तुष्टि जनाउँदै खेल छाडेको हो।
विवादको सुरुआत
संकटाको असन्तुष्टि पुरानै हो। मच्छिन्द्र फुटबल क्लबविरुद्धको खेलमा निर्णायक गोल अफसाइड भएको भन्दै संकटाले आपत्ति जनाएको थियो। बराबरीतर्फ उन्मुख खेलमा गणेश विकले गरेको निर्णायक गोल गरेका हुन्। सो खेलमा फस्ट असिस्टेन रेफ्री गणेश तामाङ थिए।
उनको लाइनबाटै सो गोल भएको थियो। उक्त खेल मच्छिन्द्रले २–१ ले जितेको थियो। त्यतिबेलै संकटा व्यवस्थापनले भविष्यमा उनलाई आफ्ना खेलमा नपार्न सुझाव दिएको थियो।
संकटा स्रोतका अनुसार लिग व्यवस्थापकले पनि उनलाई आगामी खेलमा जिम्मेवारी नदिने वाचा गर्दै घर फिर्ता पठाएको जानकारी दिएको थियो।
तर, शुक्रबार फेरि उनै गणेशलाई फस्ट असिस्टेन रेफ्रीको भूमिका दिइयो। लगत्तै संकटाको क्याम्प भड्कियो। खेल सुरु भएको छैटौं मिनेटमै अफिसियलले सबै खेलाडीलाई मैदानबाट बाहिर बोलाए।
यहीबीच फ्रेन्ड्सका सयल परियारले गोल गरे। गोलको खुशी मनाउन नपाउँदै प्रतिस्पर्धी टोली नै सामाना बोकेर मैदान छाड्दा मैदानको अवस्था तनावपूर्ण देखियो।
संकटा क्लबका अध्यक्ष इन्द्रमान एन्फाका सिइओ पनि हुन्। यसै कारण मैदानमा देखिएको विरोधाभास अझै चर्को देखिन्छ। एन्फा लिग चलाउने प्रमुख अधिकारीकै क्लबले नै खेल छाड्नुले खेलाडी र रेफ्रीबीचको विवाद होइन, सिस्टममै शंका खडा गराएको छ।
नेपालमा रेफ्रीको स्तरबारे बारम्बार आलोचना हुने गर्छ। तर, यसरी आयोजक निकायको नेतृत्वकै क्लबले रेफ्रीविरुद्ध मैदान छाड्नु भने पहिले कमै देखिएको दृश्य हो। अब प्रश्न उठ्छ— उनी र उनले हाँकेको संघको विश्वसनीयता कसरी जोगाउने? यस्तो हर्कतले लिग सञ्चालन गर्दा मर्यादित कसरी बनाउने? यसतर्फ इन्द्रमान र एन्फाले सोच्ने कि?
