काठमाडौं। नेपाली टोलीले भुटानको लामो यात्रा साफ यु–१७ महिला च्याम्पियनसिप जित्ने लक्ष्यसाथ नै गरेको थियो।
तर, कमजोर प्रदर्शनले टोलीका लागि यो प्रतियोगिता जित–हारको हिसाब नभई अनुभव र सिकाइको यात्रामा परिणत भइदिएको छ।
भारतसँगको ८–० को हार, भुटानविरुद्धको २–१ को पुनरागमन जित अनि बंगलादेशसँगका ३–० र ४–१ को त्यो निराशाजनक हार। यी नतिजाले नेपालको उपाधिको बाटो बन्द गरेका हुन्।
तर, अबका बाँकी खेलमा भने नेपाल जित्ने प्रयाससहित मैदान उत्रिने बताउँछिन्, डिफेन्डर आशिका कार्की।भारतसँग शुक्रबार खेल्नुअघि उनले भनिन्,‘बिहीबारको प्रशिक्षण राम्रो भयो, अघिल्ला गल्ती दोहोर्याउने छैनौं। भारतविरुद्ध पक्कै राम्रो खेल्छौं र जित्ने प्रयास गर्छौं।’
उनीको स्वरमा आत्मविश्वास छ। तर, भर्खरै अन्तर्राष्ट्रिय स्तरमा उत्रिएका १५–१६ वर्षका खेलाडीहरूका लागि ठूला टोलीसँग प्रतिस्पर्धा आफैंमा ठूलो परीक्षा बनिरहेको छ।
ठूला स्कोरलाइनले निराशा बढाए पनि त्यसैसँग मूल्यवान् पाठ पनि सिकाइदिएको छ। हारले पास, पोजिसनिङ र फिटनेसमा अझ कति सुधार आवश्यक छ भन्ने देखाइदिएको छ।
यही महत्त्वपूर्ण तीन चिज नमिल्दा नेपाल भुटानबाहेक अन्य दुई टोलीसँग फराकिलो गोलअन्तरको हार बेहोर्न बाध्य भएको हो।
तीमध्ये पनि भारतसँगको ७–० को हारले भने नेपाली टोलीलाई प्रतियोगिताभर मनोबल उच्च बनाउन नै दिएन। त्यसैले शुक्रबार दोस्रोपल्ट भेट्दा पनि दबाब महसुस हुने आशिका स्वीकार्छिन्।
‘पहिलो लेगको हारले मोटिभेसन पनि दिन्छ, दबाब पनि,’ उनले भनिन्। नेपाल ३ अंकमै रोकिएको छ भने भारत र बंगलादेश शीर्ष दुईमा रहेर उपाधिको दाबेदारी प्रस्तुत गरिरहेका छन्।
यो खेलमा पनि नेपालले फराकिलो हार बेहोरेको खण्डमा भारतले एक खेलअगाबै उपाधि रक्षा गर्नेछ। अर्कोतर्फ त्यसको हुन नदिन बंगलादेशले शुक्रबार नै हुने पहिलो खेलमा घरेलु टोली भुटानमाथि गोलको वर्षा गर्नुपर्ने छ।
भारत ४ खेलमा १५ अंक बटुल्दै शीर्ष स्थानमा छ। समान खेल खेलेको बंगलादेश १२ अंकसहित दोस्रो स्थानमा छ। नेपालको ३ र भुटान अझै अंकविहीन छ।
यस्तो अवस्थामा नेपाली टोलीको लक्ष्य भने आफ्नो समर्थकलाई खुसी बनाउने पनि हुने आशिका बताउँछिन्। त्यसका लागि भारतमाथि जित हात पार्ने या बराबरीको नतिजा निकाल्नुपर्नेछ।
यस्तोमा आशिका भन्छिन्, ‘हामी भारतलाई जित्ने छौं। नजिते पनि कम्तीमा बराबरी गरेर भएपनि समर्थकको मन जित्नेछौं।’
