काठमाडौं। बालगोपाल साहुखला नेपालकै पहिलो प्रो–लाइसेन्स प्राप्त प्रशिक्षक बन्ने तयारीमा रहेका छन्।
आगामी सेप्टेम्बर २०२५ देखि उनले फुटबल अस्ट्रेलियाले आयोजना गर्ने एक वर्षे एएफसी प्रो–डिप्लोमा कोर्स सुरु गर्न लागेका हुन्।
उनले सन् २०२३ मा कतार फुटबल संघमार्फत एएफसी ‘ए’ लाइसेन्स हासिल गरिसकेका थिए। उनलाई घरेलु फुटबलमा आधुनिक सोचका युवा प्रशिक्षकका रूपमा चिनिँदै आएको छ।
उनले हालसम्म नेपाली फुटबलमा विभिन्न भूमिकामा योगदान दिएका छन्। उनले नेपाली यु–२० पुरुष राष्ट्रिय टोलीमा सहायक प्रशिक्षकको जिम्मेवारी सम्हालेका थिए। नेपाल यु–१९ महिला राष्ट्रिय टोलीलाई मुख्य प्रशिक्षकको रूपमा नेतृत्व पनि गरेका थिए।
त्यसबाहेक उनले ‘ए’ डिभिजनमा च्यासल युथ क्लब, ‘बी’ डिभिजन लिगमा सरस्वती युथ क्लब र ‘सी’ डिभिजनमा महावीर क्लबको प्रशिक्षण सम्हालिसकेका छन्।
प्रशिक्षक मात्र नभई उनले एफसी रिएले नामक फुटबल क्लबको स्थापना गरेका छन्। यो क्लबले ग्रासरुट स्तरदेखि खेलाडी उत्पादन गरिरहेको छ।
यो क्लबले आफ्नो युथ डेभलपमेन्ट लिग ‘रिएले कप’ पनि आयोजना गर्दै आएको छ। हाल उनको प्रशिक्षणमा रिएलेले एन्फा महिला लिग छनोटमा प्रतिस्पर्धा गरिरहेको छ।
यो टोलीमा अधिकांश खेलाडी १९ वर्ष मुनिका छन्।
