ऐतिहासिक सिरिज विजेता नेपाली टोली भोली स्वदेश फर्कने

काठमाडौं । घरेलु टोली संयुक्त अरब इमिरेट्स (युएई) विरुद्धको एकदिवसीय र टी-ट्वान्टी अन्तराष्ट्रिय क्रिकेट सिरिज जितेर नेपाली राष्ट्रिय क्रिकेट टोली सोमबार (भोली) स्वदेश फर्कने भएका छन् ।

नेपाली राष्ट्रिय टोलीका टिम व्यवस्थापक रमन शिवाकोटीका अनुसार नेपाली टोली सोमबार अपरान्ह नेपाल आईपुग्ने कार्यक्रम रहेको छ । नेपाली टोली फ्लाई दुबई विमानबाट अपरान्ह ३:२० मा त्रिभुवन अन्तराष्ट्रिय विमानस्थलमा आइपुग्ने छ ।

युएईविरुद्ध नेपालले तीन खेलको एकदिवसीय र टी-ट्वान्टी सिरिज समान २-१ ले जितेको थियो । दुवै सिरिजको सुरुवाती खेल गुमाएपनि उत्कृष्ट पुनरागमन गर्दै नेपालले दुई सिरिज आफ्नो बनाएको थियो ।

नेपाली टोलीका लागि दुवै सिरिज ऐतिहासिक सिरिज समेत रह्यो । नेपालले पहिलो पटक एकदिवसीय र टी-ट्वान्टी सिरिज पहिलो पटक जितेको थियो ।