काठमाडौं। राजस्थान रोयल्सका १४ वर्षीय ब्याटिङ सनसनी वैभव सूर्यवंशीले विगत खेलमा बनाएको ऐतिहासिक शतकपछि आइपिएलको बिहीबारको खेलमा क्रिकेटको अनिश्चितता कस्तो हुन्छ भन्ने अनुभव गरे।
गुजरात टाइटन्सविरुद्ध सोमबार ३८ बलमा १०१ रन बनाउँदै पुरुष टी-२० क्रिकेटमा सबैभन्दा कान्छो शतक बनाउने खेलाडी बनेका सूर्यवंशी मुम्बई इन्डियन्सविरुद्धको खेलमा भने दुई बलमै डकमा आउट भए।
राजस्थानका प्रशिक्षक राहुल द्रविड़ले वैभवको प्रशंसा वा आलोचना गर्दा सतर्क रहन सुझाव दिएका थिए। कारण स्पष्ट थियो– किशोर खेलाडीका लागि सफलता र असफलता दुवै सिकाइका हिस्सा हुन्छन्। यो भविष्यवाणी सही साबित भयो।
२१८ रनको लक्ष्य पछ्याउँदै राजस्थानका ओपनर सूर्यवंशीले दोस्रो बलमै मिड अन क्षेत्र पार गर्न प्रयास गरे। तर, दीपक चाहरको डेलिभरीमा उनी विल ज्याक्सद्वारा सर्कलको किनारमै क्याच भए। जयपुरमा उपस्थित घरेलु दर्शक स्तब्ध भए।
‘जसरी उनको प्रशिक्षकले भनेका छन्, उसले सफलता मात्र होइन, असफलता पनि आत्मसात गर्न सिक्नुपर्छ,’ जब वैभव निराश मुद्रामा ब्याट हेर्दै पवेलियनतर्फ फर्किँदै थिए कमेन्टेटर इयान बिशपले भने।
सूर्यवंशी मात्र होइन, उनको विकेटसँगै राजस्थानको ब्याटिङ लाइनअप पूर्णरूपमा धराशायी भयो। ट्रेन्ट बोल्टले तीन विकेट लिए। जसप्रीत बुमराहले दुई विकेट र कर्ण शर्माले तीन विकेट लिँदा मुम्बईले राजस्थानलाई १०० रनले पराजित गर्यो। यो मुम्बईको लगातार छैटौं जित हो।
यस जितसँगै मुम्बई तालिकाको शीर्ष स्थानमा उक्लिएको छ। आठौं स्थानमा रहेको राजस्थान प्लेअफ सम्भावनाबाट बाहिरिएको छ। सूर्यवंशीका लागि यो खेल एउटा महत्त्वपूर्ण पाठ भएको छ– क्रिकेटमा एक दिन नायक, अर्को दिन साधारण बन्न सकिन्छ।
