काठमाडौं। नेपाली राष्ट्रिय क्रिकेट टोलीबाट खेल्दै नखेली अमित श्रेष्ठले सन्न्यास लिएका छन्। उनी विभागीय टोली नेपाल पुलिस क्लबबाट घरेलु क्रिकेट खेलिरहेका छन्।
सन् २०१३ मा एसीसी यु–१९ एलिट कप र एसीसी यु–१९ एसिया कप खेलेका ओपनर अमितले सिनियर टोलीबाट भने डेब्यु गर्न पाएका थिएनन्। उमेरले ३१ पुगिसकेका उनले योसँगै अन्तर्राष्ट्रिय क्रिकेटबाट सन्न्यास लिएका हुन्।
‘नेपाली यु–१९ टोलीको जर्सी लगाएर देशको प्रतिनिधित्व गर्नु मेरो सपना थियो र त्यो सपना पूरा भयो। यो यात्रा साँच्चिकै अविश्मरणीय रह्यो। हरेक क्षण, हरेक चुनौती र हरेक उपलब्धिले मलाई आजको म बनाएको छ,’ उनले भनेका छन्।
अन्तर्राष्ट्रिय क्रिकेटबाट सन्न्यास लिए पनि क्रिकेटप्रतिको माया यथावत् रहेको उनको भनाइ छ। त्यसैले घरेलु क्रिकेट खेलिरहने उनले बताएका छन्।। उनले गत वर्ष नेपाल प्रिमियर लिग (एनपिएल) को फ्रेन्चाइजी सुदूरपश्चिम रोयल्सबाट खेलेका थिए।
त्यसअघि एभरेस्ट प्रिमियर लिग (इपिएल), धनगढी प्रिमियर लिग (डिपिएल) र पोखरा प्रिमियर लिग (पिपिएल) लगायत फ्रेन्चाइजी लिग खेलिसकेका थिए।
