लुम्बिनी अपराजित हुँदै शीर्ष स्थानमा, सुदूर पनि विजयी

विराटनगर। विराटनगरमा जारी नरेश श्रेष्ठ मेमोरियल पुरुष यु–१९ राष्ट्रिय क्रिकेट प्रतियोगितामा लुम्बिनी र सूदुरपश्चिम प्रदेशले विजयी भएका छन्।

प्रतियोगिता अन्तर्गत बिहीबार बैजानाथपुरको गिरिजाप्रसाद कोइराला खेल मैदानमा सूदुरपश्चिमले गण्डकी प्रदेशलाई ५ विकेटले पराजित गरेको छ।

टस जितेर ब्याटिङ गरेको गण्डकीले निर्धारित ५० ओभरको खेलमा ३६ दशमलव ५ बलमा सबै विकेट गुमाई १ सय २ रनको झिनो योगफल बनायो। गण्डकीका कप्तान अर्जुन कुमालले ३५ रन बनाउँदा सिब्रिन श्रेष्ठले २५ रनको योगदान दिए।

सुदूरका प्लेयर अफ द म्याच सचिन भट्टले ५ विकेट लिए। उनले ८.५ बलमा ३ मेडन राख्दै १३ रन मात्र खर्चिएका थिए। सचिनबाहेक हेमन्त धामी र युवराज खत्रीले समान २–२ विकेट लिए।

१०३ रनको झिनो लक्ष्य पाएको सुदूरले २६ ओभरमा ५ विकेट गुमाउँदै सो लक्ष्य पार गरेको थियो। सुदूरका आशिष लुहारले ३९ रन बनाउँदा युवराज खत्रीले नटआउट २७ रन र  नरेन साउदले नटआउट २० रनको योगदान दिए।

गण्डकीका अपराजित पौडेलले ३ विकेट लिँदा किरण भट्टराई र सिब्रिन श्रेष्ठले १–१ विकेट दिए। सुदूरले ३ खेलमा २ मा जित हात पार्दै ४ अंकका साथ दोस्रो स्थानमा उक्लिएको छ भने गण्डकीले खेलेको ४ खेलमा २ मा जित र २ मा पराजित हुँदै नेट रन रेटको आधारमा तेस्रो स्थानमा झरेको छ।
 

त्यसैगरी, मेर्लिबोन ज्वाला क्रिकेट मैदानमा आजै भएको अर्को खेलमा लुम्बिनीले  बागमती प्रदेशलाई १ सय २ रनको विशाल अन्तरले पराजित गरेको छ। टस जितेर ब्याटिङ गरेको लुम्बिनीले निर्धारित ५० ओभरमा ७ विकेट गुमाई ७८ रन बनायो।

यो स्कोर यस प्रतियोगिताको उच्च स्कोर हो। यसअघि उच्च स्कोर बागमतीले गण्डकीविरुद्ध २२९ रन बनाएको थियो। लुम्बिनीका आकाश त्रिपाठीले ७७ रन बनाउँदा सन्तोष यादवले ६३ रन र दिल्साद अलीले नटआउट ५४ रन बनाए। बागमतीका दयानन्द मण्डल र दिनेश विष्टले २–२ विकेट लिए।
 
२७९ रनको विजयी लक्ष्य पाएको बागमतीले ४४.४ बलमा सबै विकेट गुमाउँदै १ सय ७६ रन मात्रै बनाउन सक्यो। बागमतीका रोशन विश्वकर्माले अविजित ७३ रन बनाउँदा सुर्यान्सु कोइरालाले ३२ रन र राजेश बोहराले २१ रनको योगदान दिए। लुम्बिनीका सन्तोष यादवले ३ विकेट लिँदा आकाश त्रिपाथीले पनि ३ विकेट दिए।

यादवले १० ओभर बलिङ गर्दै २ मेडन ओभर गर्दै २४ रन मात्र दिए भने त्रिपाथीले ७ दशमलव ४ बलमा ३३ रन दिएका थिए। खेलको प्लेयर अफ द म्याच त्रिपाथी  घोषित भए। लुम्बिनीले खेलेको ४ खेलमै अपराजित हुँदै ८ अंकका साथ शीर्ष स्थान यथावत् रहेको छ भने बागमतीले खेलेको ३ खेलमा १ खेलमा जित र २ खेलमा पराजित हुँदै २ अंकका साथ पाँचौ स्थानमा रहेको छ।
 
शुक्रबारको खेल बैजानाथपुरको गिरिजाप्रसाद कोइराला खेल मैदानमा मधेश र सुदूरपश्चिम प्रदेश तथा मेर्लिबोन ज्वाला क्रिकेट मैदानमा कोशी र कर्णाली प्रदेशबीच खेल हुनेछ  ।