काठमाडौं। नेपाली राष्ट्रिय पुरुष फुटबल टिमका कार्यवाहक मुख्य प्रशिक्षक नवीन न्यौपाने हाम्रो महिला टिमले सेमिफाइनलमा फेरि भारतलाई हराएर साफ महिला च्याम्पियनसिप २०२४ को फाइनलमा स्थान बनाउने विश्वास गरेका छन् ।
समूह चरणका तीनै खेल नियालेका प्रशिक्षक न्यौपानेको आधारमा घरेलु टिम नेपालले दशरथ रंगशालामा ५ पल्टको साफ च्याम्पियन भारतलाई हराउन सक्ने कारणहरू :
– जब हामीसँग बल हुन्छ, खेलाडी धैर्य हुनुपर्छ । जब हामीसँग बल हुँदैन, त्यो बेला आक्रामक हुनुपर्छ ।
– मिडफिल्डमा पकड जमाउनुपर्छ । सामान्य रूपमा बल मिस पास नगरीकन मिडफिल्डमा क्रिएटिभ खेल्नुपर्छ । भारतले कम्प्याक्ट भएर खेल्दा हामीले मिडबाट वाइड भएर खेल्नुपर्छ । वाइडमा पनि भारतले कडा निगरानी गर्यो भने बल थ्रू गर्ने गर्नुपर्छ । भारतको मिडफिल्डलाई रोक्न सक्यो भने हामीले पक्कै पनि जित्छौं ।
– भारतको दुई वर्षअघि खेलको टिम र अहिलेको टिममा पनि फरक छ । पहिला उत्कृष्ट प्रदर्शन गरेका एक–दुई खेलाडी बढी उमेरको (स्तर खस्किएको) भएजस्तो देखिएको छ । केही नयाँ खेलाडी आएका छन् ।
– हाम्रो टिम वाफ च्याम्पियनसिपदेखि एकदमै राम्रो भएको छ । धेरै वर्ष भयो एउटै टिममा खेलेका खेलाडी छन् र यो नै हाम्रो सबैभन्दा बलियो पक्ष बनाएर खेल्नुपर्छ ।
– यो नेपाली महिला फुटबलकै गोल्डेन एरा (स्वर्णिम युग) हो । यो बेला उपलब्धि हासिल गर्न सकेन भने दबाब हुन्छ तर खेलाडीले दबाब लिएर खेल्नु हुँदैन ।
– पोजिसनअनुसार अट्याकमा जाँदा ड्युटी के हो र डिफेन्समा हुँदा ड्युटी के हो भन्ने खेलाडीले ख्याल गर्नुपर्छ ।
– छिटो छरितो आक्रमण गर्न सक्यो भने स्कोर समयमै निस्किन सक्छ र हामी सजिलै जित्छौं ।
– सावित्रा भण्डारी टिममा हुनु एड्भान्टेज हो । सबै खेलाडी राम्रो छ । वाफ च्याम्पियनसिपको प्रदर्शन दोहर्याउनु आवश्यक छ । दीपा शाही र हिराकुमारी घाइते हुनु भने घाटा हो ।
– यो टिम बन्नलाई धेरै समय लागेको छ । लामो समय सँगै एउटै टिममा खेलेपछि मात्रै यस्तो सेट टिम बन्छ । यो टिमबाट यसपालि वेस्ट पर्फर्मेन्स दिएर जित्छ जस्तो लाग्छ ।
-1747652309.jpeg)
