काठमाडौं। भारतीय टोली विगत १३ वर्षदेखि जुनसुकै फर्म्याटमा विश्व च्याम्पियन बन्ने सपना देख्दै आएको छ। यही सपना पूरा गर्ने लक्ष्यमा छ, रोहित शर्माको टोली।
यो टोलीसँग १७ वर्षपछि ट्वान्टी–२० विश्वकप जित्ने मात्रै नभई फेरि एकपटक भारतलाई विश्व च्याम्पियन बनाउने अवसर छ। भारतले सन् २०१३ को च्याम्पियन्स ट्रफी पछि आइसिसीको कुनैपनि उपाधि जित्न सकेको छैन।
रोहितका लागि यो प्रतिस्पर्धा मानसिक रूपमा सहज हुनेछैन। उनको कप्तानीमा भारतले टेस्ट विश्व च्याम्पियनसिप र २०२३ को एकदिवसीय विश्वकपको फाइनल खेलेको थियो। तर, भारतमा फाइनलको यो अन्तिम बाधा पार गर्न सकेन।
रोहितको टोलीले यो अन्तिम बाधा पार गर्ने अर्को मौका पाएको छ। यससँगै भारतीय टोलीले ट्वान्टी–२० विश्वकपको तेस्रो फाइनल खेल्नेछ। अन्तिम पटक भारत १० वर्षअघि २०१४ मा फाइनल पुगेको थियो, तर श्रीलंकासँग पराजित भएको थियो।
दक्षिण अफ्रिकाविरुद्धको फाइनल खेलमा भारतलाई राम्रो सुरुवातको खाँचो पर्नेछ। त्यसैले विराट कोहलीमाथि सबैको नजर रहनेछ। यो खेलमा रोहित शर्मा र कोहलीले नै ओपनिङ गर्ने छन्। हिटम्यान रोहित अहिले फर्ममा छन्।
इङ्ल्यान्डविरुद्धको सेमिफाइनल खेलमा उनले ५७ रनको आक्रामक इनिङ्स खेलेका थिए। तर, कोहली फेरि एकपटक फ्लप साबित भएका छन्। उनले उक्त खेलमा नौ रन मात्रै बनाउन सकेका थिए। तर, कप्तान र प्रशिक्षकले इङ्ल्यान्डविरुद्धको खेलपछि कोहलीको ब्याट चल्ने र उपयोगी इनिङ्स खेल्न सक्ने विश्वास व्यक्त गरेका छन्।
ऋषभ पन्त बलियो मध्यक्रममा तेस्रो नम्बरमा ब्याटिङ गर्न आउनेछन्। उनी अहिलेको प्रतियोगितामा बलियो फर्ममा देखिन्छन्। उनले जारी प्रतियोगितामा एक सय ७१ रन बनाएका छन्। उनी यस प्रतियोगितामा भारतका लागि चौथो सर्वाधिक रन बनाउने खेलाडी हुन्।
चौथो नम्बरमा सूर्यकुमार यादव मैदान उत्रनेछन्। मैदानको चारै कुनामा सट खेल्न सक्ने क्षमता भएका यी ब्याट्सम्यानले भारतको मिडल अर्डरलाई धान्नेछन्। सेमिफाइनलमा पन्तपछि सूर्यले ४७ रनको इनिङ्स खेल्दै भारतको स्कोर १५० भन्दा माथि पुर्याउन महत्त्वपूर्ण भूमिका खेलेका थिए। उपकप्तान हार्दिक पाण्ड्या पाँचौं नम्बरमा ब्याटिङमा आउनेछन्। उनी बल र ब्याटमा भारतका लागि उपयोगी साबित भएका छन्।
यो फाइनल प्रतियोगितामा अपराजित रहेका दुई टोलीबीचको हो। भारतले सात खेल जितेको छ, जसमध्ये एक खेल वर्षाका कारण रद्द भएको थियो। दक्षिण अफ्रिका लगातार आठ खेल जितेर फाइनलमा पुगेको छ। यो फाइनल दक्षिण अफ्रिकाका लागि पनि विशेष छ। दक्षिण अफ्रिकी टोली पहिलो पटक विश्वकपको उपाधिनजिक पुगेको छ।
दक्षिण अफ्रिकाले सन् १९९८ को आईसीसी नकआउट प्रतियोगिता (अहिले च्याम्पियन्स ट्रफी) मात्रै जित्न सकेको छ। ट्वान्टी–२० र एकदिवसीय विश्वकपको सात वटा सेमिफाइनलमा पराजय भोगेको टोली पहिलो पटक फाइनलमा पुगेको हो।
दक्षिण अफ्रिकाको सफलताको मन्त्र पनि उसको टोलीको प्रदर्शन नै हो। स्पिनर केशव महाराज र तबरेज शम्सीले राम्रो प्रदर्शन गरेका छन्। शम्सीले अफगानिस्तान र वेस्ट इन्डिजविरुद्धको पछिल्लो दुई खेलमा तीन–तीन विकेट लिएका छन्।
क्विन्टन डी कक खतरनाक ब्याट्सम्यान हुन्। उनले इङ्ल्यान्डविरुद्ध ६५ र अमेरिकाविरुद्ध ७४ रनको इनिङ्स खेलेका थिए। कप्तान एडन मार्करामले कुनै ठूलो इनिङ्स खेलेका छैनन्।
हेनरिक क्लासेनले पनि ४६ र ३६* को दुई महत्त्वपूर्ण इनिङ्स खेल्न सफल भएका छन्। आईपीएलमा खराब प्रदर्शन गरेका एनरिके नोट्रेजे पनि फार्ममा फर्किएका छन्। उनले कागिसो रबाडासँगै राम्रो बलिङ गरिरहेका छन्। डेभिड मिलरले ट्वान्टी–२० मा भारतविरुद्ध २० खेलमा सर्वाधिक ४३१ रन बनाएका छन्।
हेड टू हेड
टी–२० क्रिकेटमा दक्षिण अफ्रिकामाथि भारतको दबदबा रहेको छ। यी दुईबीच जम्मा २६ खेल भएका छन्। जसमध्ये भारतले १४ र दक्षिण अफ्रिकाले ११ जित हात पारेको छ। योसँगै एउटा खेल अनिर्णित रह्यो। ट्वान्टी–२० विश्वकपमा पनि दक्षिण अफ्रिकामाथि भारतको दबदबा छ। दुवै टोली ६ पटक भिडेका छन् जसमा भारतले चार खेल जितेको छ भने दक्षिण अफ्रिकाले दुई।
