काठमाडौं । युवा तथा खेलकुद मन्त्रालयले खेलकुद शिक्षा सम्बन्धी शैक्षिक कार्यक्रमहरुको विकास गर्ने गरि पहल कदमी अघि बढाएको छ ।
मन्त्रालयले खेलकुद शिक्षाको शैक्षिक कार्यक्रम विकास गर्ने लक्ष्य सहित काठमाडौं विश्वविद्यालयसँग समझदारी गरेको छ । बुधबार सिहदरबारमा युवा तथा खेलकुद मन्त्रालय र काठमाण्डौ विश्वविद्यालयबीच समझदारी पत्रमा हस्ताक्षर भएको छ।
खेलकुद मन्त्रालयका तर्फबाट निमित्त सचिव शिव प्रसाद रेग्मी र काठमाण्डौ विश्वविद्यालयको तर्फबाट उपकुलपति प्राध्यापक भोला थापाले हस्ताक्षर गरेका छन् ।
भविष्यमा खेलकुद विज्ञान, व्यवस्थापन र शिक्षालाई सँग सँगै लैजान साझेदारी गर्ने उद्देश्य सहित सम्झौतामा हस्ताक्षर भएको मन्त्रालयले बताएको छ ।
मुख्य गरी विश्वविद्यालयमा खेलकुद सम्बद्द अध्ययन तथा अध्यापनका लागि छोटो अवधिको कोर्स सँगै स्नातक, स्नातकोत्तर र विद्यावारिधिका निम्ति समेत सम्भाव्यताको खोजी गर्ने विषयलाई प्राथमिकता दिइएको खेलकुद मन्त्रीको नीजि सचिवालयले जनाएको छ ।
सम्झौतामा हस्ताक्षर गर्ने कार्यक्रममा खेलकुद मन्त्री विराज भक्त श्रेष्ठ ज्यूले भने, 'खेलकुद शिक्षाको क्षेत्रमा आज एउटा नवीन सुरुवातको साक्षी हुन पाउँदा निक्कै हर्षित छु। मलाई विश्वास छ आज हामीले काठमाण्डौ विश्वविद्यालय सँग मिलेर रोप्ने खेल शिक्षाको बिउले कुनै दिन देशले गर्व गर्ने गरेर फल पक्कै दिनेछ।'
उपकुलपति थापाले भने, 'आजका युवा वर्गले चाहना गरेको विषयलाई नेपालमा समेत खेलकुदलाई आधुनिक उच्च सोचको पाटो बनाउन र यस मार्फत सम्रग व्यक्तित्व विकासमा यो सम्झौता महत्त्वपूर्ण हुनेछ ।'
सम्झौताले शैक्षिक संस्थाहरुमा खेलकुद सम्बद्द परियोजनाको विकास गर्ने, खेलकुद क्षेत्रमा अनुसन्धानको वृद्धि गर्ने, परियोजनाको विकास गर्ने सहित अवसरहरुको खोजी गर्ने जस्ता कार्यहरू समेटिएको छ ।
