रियल मड्रिड घरेलु मैदानमा पराजित

एजेन्सी । स्पेनिस ला लिग फुटबलमा रियल मड्रिड घरेलु मैदानमा पराजित भएको छ । आइतबार राति भएको खेलमा रियल मड्रिड रियल सोसिडाडसंग २ - ० गोल अन्तरले पराजित भएको हो ।

सान्टियागो बेर्नाबेउमा रियललाई स्तब्ध बनाउन सोसीडाडका विलियन जोसे र रुबेन पार्डोले एक एक गोल गरे ।

१० खेलाडीमा सिमित बनेको रियलविरुद्ध सोसीडाडले तेस्रो मिनेटमा जोसेको पेनाल्टी गोलबाट अग्रता बनाएको थियो ।

खेलको ६१ औं मिनेटमा लुकास भास्केजले रातो कार्ड पाएपछि रियल १० खेलाडीमा समेटियो । जसको फाइदा सोसीडाडले उठायो ।

त्यसपछि खेलको ८३ औं मिनेटमा पार्डोले गोल गर्दै सोसीडाडलाई २ - ० को जित दिलाए ।

जितसंगै सोसीडाडले १८ खेलबाट २२ अंक जोडेको छ । र, सोसीडाड लिगको ११ औं स्थानमा उक्लिएको छ ।

पराजित रियलले भने लिगको तेस्रो स्थानमा उक्लने मौका गुमाएको छ । पाँचौ स्थानको रियलले ३० अंक जोडेको छ ।