बिषयसुचिमा १० कार्यसमिति सदस्यको आपत्ती

काठमाडौं । अखिल नेपाल फुटबल संघ एन्फाको आसन्न साधारण सभामा पेश गरिने बिषय सुचिमा १० जना कार्यसमितिका सदस्यहरुले असहमती जनाएका छन् । 

कार्यसमिति बैठकमा छलफल भएका तथा निर्णय नभएका विषयलाई साधारण सभामा पेश गर्न लागिएको भन्दै वरिष्ठ उपाध्यक्ष सहित १० जना कार्यसमिति सदस्यले असहमती जनाएका हुन् ।

उनीहरुले एन्फामा निवेदन दर्ता गर्दै कार्यसमिति बैठकको निर्णय भन्दा बाहिर गएर अरु विषयसुची केन्द्रिय समितिबाट पास भएको भनि पत्राचार गरिएको भन्दै महासचिवले आफुहरुको उपस्थितीको दुरुपयोग गरेको आरोप लगाएका छन् । 
गत आर्थिक वर्षको लेखा परिक्षण प्रतिवेदन बैठकमा छलफल भएको तर सम्पूर्ण कैफियतको निराकरण नभएसम्म पास नगर्ने भनिएपनि प्रतिवेदनलाई सोही रुपमा पेश गरिएको कार्यसमिति सदस्यहरुको आपत्ती छ । उनीहरुले प्रतिवेदनलाई सोही रुपमा पेश गर्ने भए लेखा परिक्षकले प्रस्तुत गरेको म्यानेजमेन्ट लेटर साधारण सभाका सम्पुर्ण सदस्यलाई लेखा परिक्षण प्रतिवेदन संगै वितरण गरिनुपर्ने र लेखा परिक्षण प्रतिवेदनको सम्पुर्ण जिम्मेवारी अध्यक्ष, महासचिव र कोषाध्यक्षले लिनुपर्ने बताएका छन् ।

संघको आर्थिक नियमावली र आर्थिक कार्यविधि संशोधन प्रस्ताव कार्यसमिति बैठकमा आर्थिक समिति गठन पश्चात सो समितिले दिएको सुझावको आधारमा कार्यसमितिमा छलफल गर्ने सहमती बनेको तर कार्यसमितिबाट पारित नभएको उल्लेख गरेका छन् । कार्यसमितिका १० सदस्यले आफ्नो उपस्थिती दुरुपयोग भएको भन्दै साधारण सभा अगावै निर्णय पुस्तिका कार्यसमितिका सदस्यहरुलाई उपलब्ध गराउन अनुरोध गर्दै एन्फामा निवेदन दर्ता गराएका हुन् ।

एन्फाको कार्यसमिति बैठक फागुन ३ देखि ६ गतेसम्म काठमाडौंमा बसेको थियो । आफुहरुसँग छलफलनै नगरि चालू आर्थिक वर्षको बजेट र कार्यक्रम पारित गर्न खोजिएको भन्दै कार्यसमिति सदस्यले असहमती जनाएका थिए । कार्यसमितिका सदस्यहरु बैठकमा उपस्थित हुन छाडेपछि विभिन्न निर्णय कार्यसमितिबाट पारित भएको भन्दै एन्फाले प्रेस रिलिज जारी गरेको थियो । एन्फाले सार्वजनीक गरेको निर्णयमा कार्यसमिति सदस्यहरुले असहमती ब्यक्त गर्दै आफुहरुलाई सो निर्णय मान्य नहुने बताएका थिए ।

एन्फाको नियमित साधारण सभा आगामी मंगलबार बस्दैछ । बैठक अघिनै कार्यसमितिका १० सदस्यले साधारण सभामा प्रस्तुत गर्ने विषय सुचिमा असहमती जनाउँदै एन्फामा पत्र दर्ता गराउन लागेका हुन् । 

असहमती जनाउने कार्यसमिति सदस्यमा वरिष्ठ उपाध्यक्ष वीरबहादुर खड्का, उपाध्यक्षद्धय दीर्घ बहादुर केसी कुमार, विराटजंग शाही र सदस्यहरु रमेश ब्यञ्जनकार, अनिल मल्ल, भोजराज शाही, रविन्द्र चन्द, मनिश जोशी, रुपेश अधिकारी र पोमा डोल्मा लामा रहेका छन् ।