काठमाडौं । चार जिल्ला फुटबल संघले नेपालमा आयोजना भएको एएफसी यू-१५ महिला फुटबल प्रतियोगितामा अखिल नेपाल फुटबल संघ (एन्फा) का पदाधिकारीले भ्रष्ट्राचार गरेको आरोप लगाएको छ ।
काठमाण्डौं, भक्तपुर,धादिङ र ललितपुर जिल्ला फुटबल संघले बिहिबार प्रेस विज्ञप्ति निकाल्दै उक्त प्रतियोगिता दौरान एन्फाका कर्मचारीले भ्रष्ट्राचार गरेको आरोप लगाएको हो ।
चार जिल्लाले होटलको बीलको नाममा रहेको ९ लाख ६० हजार र १ लाख ३८ हजार रकममा हिनामिना गरेको आरोप लगाएको हो ।
'होटेल भ्यू भृकुटी गोदावरीबाट सनराइज बैंकको सातदोबाटो शाखाबाट (चेक नं ०००६०४५५७५) प्राप्त रकम ९ लाख ६० हजार र १ लाख ३८ हजार रकम एन्फाको खातामा नबुझाई सो रकम एन्फाका कर्मचारी राजेश श्रेष्ठबाट झिकी कोषाध्यक्ष रविन्द्र मान जोशीलाई बुझाएको देखिन्छ,' चार जिल्ला संघका अध्यक्षले हस्ताक्षर गरेको विज्ञप्तिमा भनिएको छ,'९ लाख ६० हजार र १ लाख ३८ हजार मध्येबाट केही रकम एन्फाको निर्वाचनमा तिर्नु पर्ने बाँकी र आपसमा पदाधिकारीहरु बीचमा बाँडीचुँडी खाएको देखिन्छ ।'
यस्तै चार जिल्लाले प्रतियोगिताको दौरान एएफसीबाट खेलाडीलाई आउने ७८ डलरमा ४५ डलर खर्च गरेर ३३ डलर बढी ठगी गरेको समेत आरोप लगाएको छ ।
चार जिल्ला संघले निकालेको विज्ञप्तिको पूर्णपाठ :-
एएफसीद्वारा सञ्चालित अन्डर १५ महिला फुटबल प्रतियोगिता सञ्चालनको दौरानमा विभिन्न होटेलमा खेलाडी, रेफ्री र अफिसरहरुलाई राख्ने काम भएको थियो । विगतमा यस्तै किसिमका प्रतियोगिता आयोजना गर्दा एएफसीले प्रतियोगिता आयोजना गर्नका निमित्त एकमुष्ट रकम दिँदै आएको थियो । तर हाल आएर एएफसीद्वारा सञ्चालित प्रतियोगिता होटेलको बीलअनुसार तिर्ने गर्दै आएको छ ।
यसै शिलशिलामाअखिल नेपाल फुटबल संघले विभिन्न होटेलसँग आपसी समझदारी गरी होटेलमा लाग्ने रकम भन्दा बढीको बील बनाउने त्यस वापतमा होटेलले अखिल नेपाल फुटबल संघलाई रकम दिने सर्तमा सम्झौता भएको देखिन्छ ।
सोही अनुसार होटेल ग्राण्डीबाट रकम एन्फाको खातामा जम्मा भएको छ । तर होटेल भ्यू भृकुटी गोदावरीबाट सनराइज बैंकको सातदोबाटो शाखाबाट (चेक नं ०००६०४५५७५) प्राप्त रकम ९ लाख ६० हजार र १ लाख ३८ हजार रकम एन्फाको खातामा नबुझाई सो रकम एन्फाका कर्मचारी राजेश श्रेष्ठबाट झिकी कोषाध्यक्ष रविन्द्र मान जोशीलाई बुझाएको देखिन्छ ।
९ लाख ६० हजार र १ लाख ३८ हजार मध्येबाट केही रकम एन्फाको निर्वाचनमा तिर्नु पर्ने बाँकी र आपसमा पदाधिकारीहरु बीचमा बाँडीचुँडी खाएको देखिन्छ । यस विषयमा अखिल नेपाल फुटबल संघका अध्यक्ष कर्मा छिरिङलाई पूर्ण रुपमा जानकारी छ । यसबारेमा विस्तृत छानविन हुनु जरुरी छ ।
यस विषयमा अखिल नेपाल फुटवल संघका अध्यक्षबाट अन्य विषयमा सफाई दिएता पनि माथि उल्लेखित रकमको विषयमा स्पष्ट धारणा र संघका प्रवक्ताबाट स्पष्ट अभिव्यक्ति नआउँदा त्यहाँ अनियमितता भएको प्रष्ट हुन आउँछ । यसरी होटल भ्यु भृकुटीमा दुई हप्ताको फरकमा एएफसीलाई ७८ डलरमा राखिएको र साफ दक्षिण एसियाली फुटबल प्रतियोगिता हुँदा ४५ डलरमा खेलाडी राखी एएफसीलाई ३३ डलर बढी तिराई ठगी गरी नेपाललाई बद्नाम गराउने काम अखिल नेपाल फुटबल संघबाट भएको छ ।
१) विराट जंग शाही (काठमाडौं जिल्ला फुटवल संघ अध्यक्ष)
२) गौतम सुजखु (भक्तपुर जिल्ला फुटवल संघ अध्यक्ष)
३) दिपक खतिवडा (धादिङ जिल्ला फुटवल संघ अध्यक्ष)
४) पुरुषोत्तम थापा (ललितपुर जिल्ला फुटवल संघ अध्यक्ष
