धनगढीलाई शीर्ष स्थानमा उक्लिने मौका

काठमाडौं । नेपाल सुपर लिग एनएसएलमा शनिबार दुई खेल हुदैछ ।

पहिलो खेलमा धनगढी एफसी र स्पोर्टिङ इलाम खेल्नेछन् । खेल दशरथ रंगशालामा दिउँसो १ बजे सुरु हुनेछ । 

दोस्रो खेलमा बुटवल लुम्बिनी र काठमाडौं रेजर्स भिड्नेछन् । खेल साँझ ५ बजे सुरु हुनेछ ।

धनगढीले लिगको चौथों म्याच खेल्दैछ, स्पोर्टिङ इलामसँग । इलामलाई हराउँदै धनगढीलाई लिगको शीर्ष स्थानमा उक्लिने अवसर छ । धनगढीले २ जित र १ बराबरीको नतिजा सहित ७ अंकले दोस्रो स्थानलाई होल्ड गरेको छ । 

इलामको कथा फरक छ । शनिबारको खेल उसलाई निकै महत्वपुर्ण छ, सुपर फोरमा पुग्न । उसले लिगको पाँचौं खेल खेल्दैछ, निरन्तरको खराब नतिजाले उसलाई शीर्ष चारको दौडमा कमजोर बनाईदिएको छ । त्यसैले शनिबार धनगढीलाई निराश बनाउनैपर्ने दबाब इलामसँग छ । इलाम १ जित, तीन हार सहित ३ अंक बटुलेर तालिकको सातौं स्थानमा छ ।

दोस्रो खेलमा भिड्नेछन्, बुटवल लुम्बिनी र काठमाडौं रेजर्स । बुटवल भन्दा काठमाडौंले एक खेल कम खेलेको छ, तर साविक विजेता काठमाडौं लिगको शीर्ष चारमा छ । शनिबारको नतिजाले काठमाडौंलाई शीर्ष स्थानमा पुर्याउन पनि सक्छ र त्यसका लागि उसले बुटवललाई निराश बनाउनुपर्नेछ भने धनगढी पहिलो खेलमा कम्तिमा रोकिनुपर्नेछ । काठमाडौं ५ अंक सहित तालिकाको चौथों स्थानमा छ ।

पछिल्लो समय सुधारिएको प्रर्दशन र नतिजा दुवै निकालेको बुटवललाई शीर्ष चारको दौडमा रहन काठमाडौंलाई हराउनुपर्ने दबाब छ । बुटवल पछिल्लो दुई खेलमा ४ अंक बटुलेर आफुलाई छैटौं स्थानमा राख्न सफल भएको छ ।