अफगानिस्ताविरुद्धको सिरिज बंगलादेशलाई
काठमाडौं । घरेलु टोली बंगलादेशले अफगानिस्तानसँगको दुई खेलको टी-ट्वान्टी अन्तर्राष्ट्रिय सिरिज क्लिनस्विप गरेको छ ।
आईतबार भएको दोस्रो खेलमा अफगानिस्तानलाई ६ विकेटले हराउँदै बंगलादेशले सिरिज जितेको हो ।
बर्षाले प्रभावित खेल १७ ओभरमा छोट्टाईएको थियो ।
अफगानिस्तानले दिएको १ सय १७ रनको लक्ष्य बंगलादेशले १६ दशमलब १ ओभरमा ४ विकेट गुमाउँदै पूरा गर्यो ।
बंगलादेशका लागि ओपनर लिटन दासले ३६ बलमा ६ चौकासहित सर्वाधिक ३५ रनको योगदान दिए ।
अफिफ हुसैन २० बलमा २ छक्कासहित २४ तथा तोवहिद हृदोयले १९ रन बनाए । कप्तान सकिब अल हसन ११ बलमा १ चौका र १ छक्कासहित २८ रनमा आउट भए ।
अफगानिस्तानका मुजिब उर रहमान र अजमतुल्लाह उमरजाईले समान २/२ विकेट लिए ।
त्यसअघि अफगानिस्तानले टस हारेर पहिला ब्याटिङ गर्दै निर्धारित १७ ओभरमा ७ विकेट गुमाउँदै १ सय १६ रन बनाएको थियो ।
अफगानिस्तानका आजमतुल्लाह ओमरजाईले २५, करिम जन्नत २० र इब्राहिम जद्रान २२ रनमा आउट भए ।
बंगलादेशका तस्किन अहमदले ३ तथा मुश्ताफिजुर रहमान र सकिब अल हसनले समान २/२ विकेट लिए ।
पहिलो खेलमा बंगलादेश २ विकेटले विजयी भएको थियो ।
