काठमाडौं । जिम्बावेमा जारी रहेको आइसीसी विश्वकप छनोटको अन्तर्गत सातौं स्थानका लागि नेपाल र आयरल्यान्डबीच आज मंगलबार खेल हुदैछ ।
नेपाल र आयरल्यान्डबीचको खेल हरारेमा रहेको टाकासिंगा स्पोर्टस् क्लबमा हुदैछ । दुई टोलीबिचको खेल नेपाली समय अनुसार मध्यान्ह पौने १ बाट सुरु हुनेछ ।
नेपालले आयरल्यान्डसँग ओडिआई खेल खेल्न लागेको यो पहिलो अवसर हो । आयरल्यान्ड नेपालले ओडिआई खेल्न लागेको तेस्रो टेस्ट मान्यता प्राप्त मुलुक हो ।
नेपालले सातौं स्थानको लागि भएको दोस्रो सेमिफाइनल खेलमा आईतबार युएईलाई हराउँदै आयरल्यान्डसँग भेट पक्का गरेको हो । आयरल्यान्डलाई पराजित गरी नेपाल पहिलो टेस्ट मान्यता प्राप्त टोलीलाई हराउन चाहन्छ । यसका लागि नेपालले आफ्नो बलियो प्लेईङ-११ मैदानमा उतार्ने अनुमान गर्न सकिन्छ ।
गत आईतबार युएईसँगको खेलेको प्लेईङ-११ मा आजको खेलमा दुई परिवर्तनको सम्भावना रहेको छ । युएई विरुद्धको खेलमा नेपालले तीन परिवर्तन गरेको थियो । आसिफ शेख, कुसल मल्ल र ललित राजवंशी टिमबाट हटेका थिए । अर्जुन साउद, ज्ञानेन्द्र मल्ल र प्रतिस जिसीले मौका पाएका थिए ।
आयरल्यान्डसँगको खेलमा आसिफ र कुशल टिम फर्कने सम्भावना रहेको छ । लामो समय पछि मौका पाएका अर्जुन र ज्ञानेन्द्रको ब्याट युएईविरुद्धको खेलमा नचलेकोले उनीहरुले आज मौका पाउँने सम्भावना कम रहेको छ ।
नेपालको ओपनिङ जोडिका रुपमा कुशल भुर्तेल र आशिफ शेखको जोडि नै रहने प्रवल सम्भावना रहेको छ । गत खेलमा ओपनरको भुमिकामा देखिएका अर्जुन साउद प्लेईङ-११ को हिस्सा नै नहुने सम्भावना रहेको छ ।
तेस्रो नम्बरमा युवा ब्याटर भीम सार्कीले मौका पाउने सम्भावना रहेको छ । गत खेलमा अनुभवको हिसावले तेस्रो नम्बरमा ब्याटिङमा आएका ज्ञानेन्द्र मल्ल आज टोलीमा नरहने प्रवल सम्भावना रहेको छ ।
चौथो नम्बरमा ओडिआई क्रिकेटमा नेपालका लागि सर्वाधिक सफल ब्याटर तथा कप्तान रोहित पौडेलले मौका पाउने सम्भावना रहेको छ । तर, जिम्बावे भ्रमणमा उनको ब्याटबाट खास रन बन्न सकेको छैन । नेपालको अन्तिम खेलमा कप्तानको ब्याटबाट ठूलो ईनिङको अपेक्षा रहेको छ ।
पाँचौं स्थानमा नेपालका मध्यक्रमको राम्रा खेलाडी मानिने आरिफ शेख रहने सम्भावना छ । आरिफको प्रदर्शनका कारण नेपालको मध्यक्रम बलियो मानिएको छ । टोलीलाई आवश्यकता परेमा शेखले मिडियम पेस बलिङ समेत गर्ने क्षमता राख्नेछन् ।
छैटौं स्थानमा अलराउन्डर दीपेन्द्रसिंह ऐरी रहने सम्भावना रहेको छ । जिम्बावे भ्रमणका क्रममा लयमा देखिएका दीपेन्द्रबाट आज पनि सोहि अपेक्षा रहने छ । १० ओभर स्पिन बलिङका प्याकेज दीपेन्द्र फिल्डिङमा समेत उत्तिकै अब्बल रहदै आएका छन् ।
अलराउन्डर कुशल मल्ल सातौं नम्बरमा रहने सम्भावना रहेको छ । गत खेलमा विश्राम दिईएको कुशलको ब्याटले जिम्बावे भ्रमणका क्रममा खास विष्फोटक ब्याटिङ गरेको छैन । आज सो विस्फोटक क्षमता देखिने अपेक्षा रहेको छ । उनबाट टिमले राम्रो फिनिश सहित केही ओभर स्पिन बलिङको समेत अपेक्षा रहने छ ।
अलराउन्डर गुलसन झाले आठौं नम्बरमा स्थान बनाउने सम्भावना रहेको छ । राम्रो ब्याटिङ क्षमता तथा तिव्र गतिको बलिङका लागि चिनिएका झाबाट ब्याटिङमा राम्रो फिनिशको अपेक्षा रहने छ ।
तिव्र गतिका बलर करण केसी नवौं नम्बरमा रहने सम्भावना रहेको छ । दशौं नम्बरमा गत खेलमा मौका पाएका प्रतिस जिसीले निरन्तर रहने सम्भावना रहेको छ ।
एघारौं नम्बरमा नेपाली टोलीका पूर्व कप्तान तथा लेग स्पिनर सन्दीप लामिछाने रहने सम्भावना रहेको छ । सन्दीप जिम्बावे भ्रमणको सुरुआती केही खेलमा लयमा बाहिर देखिएका थिए । तर, केही खेल यता सन्दीप लयमा रहेकाले आजको खेलमा पनि राम्रो गर्ने अपेक्षा रहेको छ ।
नेपालको सम्भावित प्लेईङ-११
आसिफ शेख (विकेटकिपर), कुशल भुर्तेल, भीम सार्की, रोहित पौडेल (कप्तान) , आरिफ शेख, दीपेन्द्रसिंह ऐरी, कुशल मल्ल, गुलसन झा, करण केसी, सन्दीप लामिछाने र प्रतिश जि.सी
(नोट : खेलको आवश्यकता अनुसार ब्याटिङक्रम तल माथि हुन सक्छ । )
