काठमाडौं । जिम्बावेमा जारी आइसीसी एकदिवसीय विश्वकप छनोटमा सेन विलियम्सको शतकको सहयोगमा घरेलु टोलीले ओमानलाई ३ सय ३३ रनको लक्ष्य दिएको छ ।
क्विन्स स्पोर्टस् क्लबको मैदानमा जारी खेलमा टस हारेर पहिले ब्याटिङ गरेको जिम्बावेले निर्धारित ५० ओभरमा ७ विकेट गुमाएर ३ सय ३२ रन बनायो ।
जिम्बावेका लागि सेन विलियम्सले १ सय ३ बलमा १४ चौका र ३ छक्काको सहयोगमा १ सय ४२ रनको शतकीय ईनिङ खेले । ओडिआई करियरको आठौं शतक विलियम्सले ८१ बलमा पूरा गरेका थिए । यस प्रतियोगितामा पाँचौं खेल खेल्दै गरेका विलियम्सको यो तेस्रो शतक हो ।
कप्तान क्रिग इर्भान र गुम्बिले पहिलो विकेटका लागि ४६ रनको साझेदारीका साथ राम्रो सुरुआत दिलाएका थिए । इर्भानले ४० बलमा २५ रन बनाए । ओपनर गुम्बिले ३४ बलमा २१ रन बनाए ।
चौथो विकेटका लागि विलियम्स र सिकन्दर राजाले ९४ बलमा १ सय २ रनको उत्कृष्ट साझेदारी गरे । राजाले ४९ बलमा ६ चौकाको सहयोगमा ४२ रन बनाए ।
ल्यूक जोन्गवेले २८ बलमा ४ चौकाको सहयोगमा अविजित ४३ रन बनाए । रिचार्ड नभगर्भाले ४ बलमा अविजित ११ रन बनाउँदा रायन बर्लले १२ बलमा १३ रन बनाए ।
ओमानको लागि फैयज बटले ४ तथा कप्तान जिशान मकशुद,बिलाल खान र कलिमुल्लाहले समान १/१ विकेट लिए ।
जिम्बावे नेपाल रहेको समूह ए मा अपराजित रहँदै सुपर सिक्समा पुगेको हो । ओमान भने समूह बी को तेस्रो स्थानमा रहेर सुपर सिक्समा पुगेको हो ।
सुपर सिक्सको पहिलो जित हात पारी ओमान गुमेको लय फिर्ता ल्याउन चाहन्छ । आजको खेलमा पराजित भएमा ओमानको विश्वकपमा छनोटको सम्भावना कठिन बन्नेछ ।
घरेलु टोली भने जितको लयलाई निरन्तरता दिन चाहन्छ । ओमानलाई पराजित गरि जिम्बावे विश्वकप छनोटको सम्भावना बलियो बनाउन चाहन्छ ।
