काठमाडौं । ओपनर पल स्टर्लिङको सानदार शतकमा आयरल्यान्डले आइसीसी विश्वकप छनोटको युएईलाई हराएको छ ।
प्रतियोगिताको पहिलो जित निकाल्नेक्रममा आयरल्यान्डले १ सय ३८ रनको सानदार जित हात पारेको हो ।
प्रतियोगिताको समूह चरणका चार खेल युएईले जित बिहिन रुपमा सकाएको छ ।
आयरल्यान्डले दिएको ३ सय ५० रनको लक्ष्य पछ्याएको युएई ३९ ओभरमा २ सय ११ रनमा अलआउट भयो।
युएईका लागि सन्चित शर्माले ५४ बलमा १ चौका र ३ छक्काको सहयोगमा ४४ रन बनाए । ओपनर मुहम्मद वासिम र आर्याशं शर्माले पहिलो विकेटका लागि ४४ बलमा ५८ रनको साझेदारी गरेर राम्रो सुरुआत दिलाएका थिए ।
वासिमले ३२ बलमा ६ र्चाका र २ छक्काको सहयोगमा ४५ रन बनाए । शर्माले २६ बलमा १८ रन बनाए । त्यसपछि खेलाडीबीच कुनै राम्रो साझेदारी हुन सकेन ।
सातौं विकेटका लागि वासिल हमिद र सन्चित शर्माले ८६ बलमा ७० रनको साझेदारी गरेर युएईलाई खेलमा फर्काउने कोसिस गरेका थिए । वासिल हमिदले ५२ बलमा ३ छक्काको सहयोगमा ३९ रन बनाए ।
आयल्यान्डका लागि कुर्टिस क्यामफेर, जोशुवा लिटिल र एन्डि म्याकब्रिड र जर्ज डकरेलले समान २/२ विकेट लिए ।
त्यसअघि टस हारेर पहिला ब्याटिङको गरेको आयरल्यान्डले निर्धारित ५० ओभरमा ४ विकेट गुमाउँदै ३ सय ४९ रन बनायो ।
आयरल्यान्डका ओपनर पल स्टर्लिङले १ सय ३४ बलमा १५ चौका र ८ छक्कासहित १ सय ६२ रनको सानदार शतकीय इनिङ खेले । ओडिआई करिअरको १४ औं शतक उनले १ सय बलमा पूरा गरेका थिए ।
कप्तान एन्डी बालबर्नी ८८ बलमा ५ चौका र १ छक्कासहित ६६ रनको अर्धशतकीय ईनिङ खेले । दोस्रो विकेटका लागि स्टर्लिङ र बालबर्नीले १ सय ८४ रनको शतकीय साझेदारी गरेका थिए ।
ह्यारी टेक्टर ३३ बलमा ४ चौका र २ छक्कासहित ५७ रनमा आउट भए । लोर्कान टकर १९ र जर्ज डोकरेल १५ रनमा अविजित रहे ।
युएईका लागि सन्चित शर्माले ३ तथा अली नासिरले १ विकेट लिए ।
जितसँगै आयरल्यान्ड समूह बी को चौथो स्थानमा रहेको छ । पुछारमा रहेको युएईले भने प्लेअफमा नेपालसँग खेल्नेछ । नेपाल र युएईबीचको खेल आगामी आईतबार हुनेछ ।
आयरल्यान्डले प्लेअफमा अमेरिकासँग खेल्नेछ । आयरल्यान्ड र अमेरिकाबीच पहिलो प्लेअफमा शुक्रबार खेल्नेछ ।
दुई खेलका विजेताले सातौं स्थानका लागि मंगलबार खेल्नेछन् । पराजित दुई टोली भने ९ औं स्थानको लागि अर्को साताको बिहीबार खेल्नेछन् ।
