काठमाडौं । आइसीसी विश्वकप छनोटमा युएई लगातार तेस्रो हारका साथ समूह चरणबाटै बाहिरिएको छ ।
लगातार तेस्रो हारसँगै समूह चरणबाटै बाहिरिने युएई दोस्रो टोली हो । यस अघि सम्रह ए को अमेरिका पनि समूह चरणबाट बाहिरिएको थियो ।
सुपर सिक्समा प्रवेशको सम्भावना जिवित राख्न जित्नै पर्ने खेलमा युएई १ सय ११ रनले पराजित भएको हो ।
स्कटल्यान्डले दिएको २ सय ८३ रनको लक्ष्य पछ्याएको युएई ३५ दशमलब ३ ओभरमा १ सय ७१ रनमा अलआउट भयो ।
युएईका कप्तान मोहम्मद वासिमले ५७ बलमा ६ चौकासहित ३६ रन बनाए । त्यस्तै बासिल हामिद २९ बलमा २ चौका र २ छक्कासहित ३० तथा रोहन मुस्तफा १२ मा आउट भए ।
स्कटल्यान्डका सफ्यान शरिफले ४ तथा क्रिस सोलले ३ विकेट लिए ।
त्यसअघि टस हारेर पहिला ब्याटिङ गरेको स्कटल्यान्डले निर्धारित ५० ओभरमा ८ विकेट गुमाएर २ सय ८२ रन बनाएको थियो ।
स्कटल्यान्डका लागि कप्तान रिचिं बेरिङ्गटनले १ सय ३६ बलमा ९ चौका र ३ छक्काको सहयोगमा १ सय २७ रनको शतकीय ईनिङ खेले । ओडिआई करियरको चौथो शतक बेरिङ्गटनले १ सय २३ बलमा पूरा गरेका थिए । ईनिङको अन्तिम बलमा कप्तान रन आउट हुन पुगे ।
सुरुआत राम्रो हुन नसकेको स्कटल्यान्डले पहिलो पावर प्लेमा २६ रन बनाउँदा ३ विकेट गुमाईसकेको थियो । तेस्रो विकेट पश्चात क्रिजमा आएका कप्तान रिचि आएका थिए ।
छैटौं विकेटका लागि कप्तान रिचिले माईकल लिक्ससँग ७४ बलमा ६७ रनको साझेदारी गरे । यो साझेदारीले टिमलाई सम्मानजनक योगफलसम्म पुग्न सहयोग गर्यो । लिक्सले ४६ बलमा ३ चौका र २ छक्काको सहयोगमा ४१ रन बनाए ।
सातौं विकेटका रुपमा कप्तानले क्रिस ग्रेभ्ससँग ५७ बलमा ५१ रनको साझेदारी गरे । ग्रेभ्सले २८ बलमा ३ चौकाको सहयोगमा २२ रन बनाए । आठौं विकेटका लागि कप्तान बेरिङ्गटन र मार्क वाटले ६६ बलमा १ सय ९ रनको साझेदारी गरे । यो साझेदारीले टोलीलाई बलियो योगफलसम्म पुर्यायो ।
वाटले ३१ बलमा ४ चौका र २ छक्काको सहयोगमा अविजित ४४ रन बनाए ।
युएईका लागि जुनेद सिद्धिकीले ३ तथा अलि नासिरले २ विकेट लिए ।
दुई खेलमा अपराजित स्कटल्यान्ड ४ अंक सहित दोस्रो स्थानमा उक्लिएको छ । लगातार तेस्रो हार सहित अंक बिहिन युएई प्रतियोगिताबाट बाहिरिएको छ ।
