काठमाडौं । जिम्बावेमा जारी रहेको आइसीसी एकदिवसीय छनोट प्रतियोगितामा स्कटल्यान्ड विजयी सुरुआत गरेको छ ।
हरारेमा रहेको क्विन्स स्पोर्टस् क्लबको मैदानमा भएको खेलमा स्कटल्यान्डले आयरल्यान्डलाई १ विकेटले रोमान्चक रुपमा हराएको हो ।
आयरल्यान्डले दिएको २ सय ८७ रनको लक्ष्य स्कटल्यान्डले निर्धारित ५० ओभरको अन्तिम बलमा ९ विकेट गुमाएर पूरा गर्यो ।
स्कटल्यान्डका लागि माईकल लिस्कले ६१ बलमा ८ चौका र ४ छक्काको सहयोगमा अविजित ७९ रनको अर्धशतकीय ईनिङ खेले । क्रिस्टोफर म्याकब्रिडले ६० बलमा ६ चौका र १ छक्काको सहयोगमा ५६ रन बनाए । स्कटल्यान्डले ६ रनमा पहिलो विकेट गुमाएको थियो ।
दोस्रो विकेटका लागि क्रिटोफर म्याकब्रिड र ब्रन्डम म्याकमुलनले ५० रनको साझेदारी गरेर स्कटल्यान्डलाई खेलमा फर्काउने कोसिस गरेका थिए । म्याकमुलनले २५ बलमा १० रन बनाएका थिए ।
त्यसपछि स्कटल्यान्डले निरन्तर विकेट गुमाईरह्यो । आठौं विकेटका लागि माईकल लिस्क र मार्क वाटले ६७ बलमा ८२ रनको साझेदारी गरेका थिए । उनीहरुले स्कटल्यान्डको जितका लागि महत्वपूर्ण साझेदारी गरे । वाटले ४३ बलमा ४७ रन बनाए ।
नवौं विकेटका लागि लिस्क र सफियान सरिफले २७ बलमा ५० रनको साझेदारी गरे । सरिफले ९ बलमा ६ रन बनाए ।
आयरल्यान्डका लागि मार्क अडिरले ३ तथा जोशुवा लिटिल २ विकेट लिए । जर्ज डकरेल, कुर्टिस क्यामफायर र बेन ह्वाईटले समान १/१ रन लिए ।
त्यसअघि टस हारेर पहिले ब्याटिङ गरेको आयरल्यान्डले निर्धारित ५० ओभरमा ८ विकेट गुमाएर २ सय ८६ रन बनाएको थियो ।
आयरल्यान्डका लागि कुर्टिस क्यामफेरले १ सय ८ बलमा ९ चौका र ४ छक्काको सहयोगमा १ सय २० रनको शतकीय ईनिङ खेलेका थिए । ओडिआईमा पहिलो शतक क्यामफेरले ९९ बलमा पूरा गरेका थिए ।
आयरल्यान्डले पहिलो ओभरमा नै दुवै ओपनरलाई गुमाएको थियो । त्यसपछि क्रिजमा आएका कुनै पनि ब्याटर क्रिजमा जम्न सकेनन् ।
७० रनमा ५ विकेट गुमाईसकेको अवस्थामा जर्ज डकरेल र कुर्टिस क्यामफेरले बलमा १ सय ५० बलमा १ सय ३६ रनको महत्वपूर्ण साझेदारी गरेसँगै टोलीले सम्मानजनक योगफल बनाउन सक्यो ।
डकरेलले ९३ बलमा ४ चौका र १ छक्काको सहयोगमा ६९ रनको अर्धशतकीय ईनिङ खेले । गारेथ डिलेनीले १४ बलमा १९ रन बनाए ।
स्कटल्यान्डका लागि ब्रेन्डन म्याकमुलनले ५ तथा क्रिस सोल, क्रिस्टोफर म्याकब्रिड र मार्क वाटले समान १/१ विकेट लिए ।
जितबाट प्रतियोगिताको सुरुआत गरेको स्कटल्यान्ड समूह बी को तेस्रो स्थानमा रहेकोे छ ।
दोस्रो खेलमा दोस्रो हारका साथ आयरल्यान्ड अंकबिहिन रुपमा समूह बी को चौथो स्थानमा रहेको छ । यस हारसँगै सुपर सिक्स पुग्ने आयरल्यान्डको सम्भावना कमजोर बनेको छ ।
