काठमाडौं । जिम्बावेमा जारी आइसीसी एकदिवसीय विश्वकप छनोटमा आफ्नो दोस्रो खेलमा युएईले ओमानलाई २ सय २८ रनको लक्ष्य दिएको छ ।
बुलवायो स्पोर्टस् क्लबमा टस हारेर पहिले ब्याटिङ गरेको युएई निर्धारित ५० ओभरमा ८ विकेट गुमाएर २ सय २७ रन बनायो ।
युएईका लागि आयान खानले ५२ बलमा १० चौकाको सहयोगमा अविजित ५८ रनको अर्धशतकीय ईनिङ खेले । वृत्य अरबिन्दले ८४ बलमा ३ चौकाको सहयोगमा ४९ रन बनाए ।
युएईले ओपनर मुहम्मद वासिम तथा रोहन मुस्ताफलाई समान ८/८ रनमा गुमाएको थियो । तेस्रो विकेटका लागि वृत्य र रमिज शाहजादले १ सय २७ बलमा ८७ रनको महत्वपुर्ण साझेदारी गरेर युएईलाई खेलमा फर्काउने कोशिश गरेका थिए ।
तर, निरन्तर विकेट गुमेपछि ओमान खेलमा हाबी भएको थियो । शाहजादले ५१ बलमा ५ चौकाको सहयोगमा ३८ रन बनाएका थिए ।
छैटौं विकेटका लागि आसिफ खान र आयान खानले ३० बलमा २० रनको महत्वपुर्ण साझदारी गरेका थिए । आसिफ खानले ४४ बलमा २ चौका र १ छक्काको सहयोगमा २४ रन बनाए ।
आठौं विकेटका लागि कार्तिक मैयप्पन र आयान खानले ४० बलमा ४० रनको महत्वपूर्ण साझेदारी गरेका थिए । मैयप्पन ७ रनमा आउट भए ।
ओमानको लागि जय ओडेराले ३ तथा फैयज बट र बिलाल खानले समान २/२ विकेट लिए ।
ओमानले पहिलो खेलमा आयरल्यान्डलाई पराजित गरेको थियो ।
ओमानले टेस्ट मान्यताप्राप्त राष्ट्रलाई पहिलो भेटमा नै हराएर ईतिहास बनाएको थियो । आजको खेलमा युएईलाई हराएर सुपर सिक्सको सम्भावना बलियो बनाउने सोचमा ओमान रहेको छ ।
युएई पहिलो खेलमा उपाधी दाबेदारमध्येको एक श्रीलंकासँग फराकिलो अन्तरमा पराजित भएको थियो । आजको खेलमा ओमानलाई पराजित गरि युएई सुपर सिक्सको सम्भावना जिवितै राख्न चाहन्छ ।
