काठमाडौं । प्रदेश नम्बर एक सरकारले दुई वटा फुटबल प्रतियोगिता आयोजना गर्न १० करोड रुपैयाँको उपलब्ध गराउने भएको छ । प्रदेश लिग र अन्तराष्ट्रिय आमन्त्रण फुटबल प्रतियोगिता आयोजना गर्न प्रदेश नम्बर एक सरकारले अखिल नेपाल फुटबल संघ एन्फासंग ५ बर्षको सम्झौता गरेको छ ।
प्रदेश कप लिग फुटबल प्रतियोगिता र अन्तराष्ट्रिय आमन्त्रण मुख्यमन्त्री कप फुटबल प्रतियोगिता आयोजना गर्ने सम्बन्धमा प्रदेश एकका तर्फबाट सामाजिक विकास मन्त्री जीवन घिमिरे र एन्फा अध्यक्ष कर्माछिरिङ शेर्पाले सम्झौता पत्रमा हस्ताक्षर गरेका छन् ।
सम्झौता अनुसार प्रदेश सरकारको सहकार्यमा सञ्चालन हुने मुख्यमन्त्री कप प्रदेश नम्बर एक लिग फुटबल प्रतियोगिता सञ्चालन गर्न प्रदेश सरकारले बार्षिक एक करोड रुपैयाँ उपलब्ध गराउनेछ । प्रदेश सरकारसंग ५ बर्षका लागि गरिएको सम्झौतामा प्रदेश एकका १४ जिल्ला फुटबल टिमले अनिवार्य सहभागिता जनाउनेछन् ।
लिगका शीर्ष दुई टिमलाई अन्तर प्रदेश कपमा सहभागि गराउने एन्फाले जनाएको छ । प्रतियोगिता आयोजना गर्न एन्फाले प्रदेश सरकारसंग परामर्श गरेर प्रदेश स्तरीय लिग कमिटि गठन गर्नेछ ।
यस्तै, प्रदेश सरकारको सहकार्यमा हुने अन्तराष्ट्रिय आमन्त्रण मुख्यमन्त्री कप फुटबल प्रतियोगिता सञ्चालन गर्न प्रदेश सरकारले एन्फा र प्रदेश खेलकुद बोर्डको परामर्शमा मन्त्रिपरिषद्बाट गठित आयोजक समितिलाई एक करोड रुपैयाँ उपलब्ध गराउनेछ ।
प्रतियोगिता सञ्चालन गर्न प्रदेश सरकारले एक करोड रुपैयाँ पाँच बर्षका लागि उपलब्ध गराउनेछ । प्रतियोगितामा प्रदेशका ७ उत्कृष्ट टिम, ए डिभिजनका शीर्ष ६ टोली र विदेशी आमन्त्रित तीन टिम समावेश गरेर बढीमा १६ टिम समावेश गरिनेछ ।
प्रदेश नम्बर एक सरकारले नेपाली फुटबल विकासमा गरेको लगानी घरेलु फुटबलका लागि कोशेढुङ्गा सावित हुने एन्फा प्रवक्ता किरण राई र सामाजिक विकास मन्त्रालयका निमित्त सचिव उपेन्द्र दाहालद्वारा जारी बिज्ञप्तीमा उल्लेख छ ।
हेर्नुस पत्र :
-1733925567.jpeg)
