नवौं राष्ट्रिय :  पुलिसकी विद्या राईलाई राष्ट्रिय किर्तिमानीसहित स्वर्ण

पोखरा ।  नवौं राष्ट्रिय खेलकुद अन्तर्गत भारोत्तोलनमा नेपाल पुलिसकी विद्या राईले बुधबार स्न्याचमा राष्ट्रिय कीर्तिमान कायम गर्दै स्वर्ण जितेकी छिन् ।

महिला ८७ केजी माथि तौल समूहमा राईले स्न्याचतर्फ ७६ र क्लीन एण्ड जर्कमा ८८ गरी कुल १६४ केजी भार बहन गर्दै स्वर्ण जितेकी हुन् । स्न्याचमा यसअघि ७५ केजीको कीर्तिमान रहेकोमा विद्याले १ केजी बढी भार बहन गरेको रेफ्री सञ्जय महर्जनले जानकारी दिए ।

यस्तै भारोत्तोलनमा एपीएफ क्लबले पहिलो स्वर्ण पदक जितेको छ । महिला ८७ केजी तौल समूहमा एपीएफकी निशा बलालले स्वर्ण पदक जितिन् । उनले स्न्याचमा ६२ र क्लीन एण्ड जर्कमा ७७ गरी कुल १३९ केजी भार बहन गर्दै एपिएफलाई पहिलो स्वर्ण दिलाएकी हुन् ।

बुधबार नै  पुलिसकी जयन्ती श्रेष्ठले स्न्याचमा ६३ र क्लीन एण्ड जर्कमा ७४ गरी कुल १३७ केजी भार बहन गर्दै रजत जितिन् भने नेपाल आर्मीकी अस्मिता राई कास्यमा सीमित भइन् । उनले स्न्याचमा ५७ र क्लीन एण्ड जर्कमा ८८ गरी कुल १२५ केजी भार उठाएकी हुन् ।

 यस्तै, एपीएफकी शिखा थापाले रजत र गण्डकीकी सिन्जल गुरुङले कास्य पदक जितिन् । शिखाले स्न्याचतर्फ ४० र क्लीन एण्ड जर्कमा ५३ गरी कुल ९३ केजी भार बहन गरिन् भने गण्डकीलाई पहिलो कास्य दिलाउन सिन्जलले स्न्याचमा ४० र क्लीन एण्ड जर्कमा ५० सहित ९० केजी भार उठाईन् । घरेलु टोली गण्डकीले यसअघि रजत जितेको थियो ।

२० स्वर्णसहित ६० पदकका लागि भएको प्रतिस्पर्धा बुधबारदेखि सकिंदैछ । हालसम्म १६ स्वर्णको टुंगो लागेकोमा नेपाल प्रहरीले ९, नेपाल आर्मीले ४, सुदूरपश्चिमले २ स्वर्ण र एपिएफले १ स्वर्ण जितेका छन् ।