नवौंका लागि सुदूरपश्चिमबाट करिब ७ सय खेलाडी छनोट

कैलाली । नवौं राष्ट्रिय खेलकुद प्रतियोगिता अन्तर्गत सुदूरपश्चिम प्रदेशस्तरीय छनोट प्रतियोगिता सम्पन्न भएको छ ।

गत भदौ ३१ गतेदेखि सुरु भएको छनोट प्रतियोगिता शुक्रबार सम्पन्न भएको हो ।

सुदूरपश्चिम प्रदेश खेलकुद परिषद्का अनुसार फुटबल, क्रिकेट, कबड्डी, भलिबल, बास्केटबल, ह्यान्डबल, ब्याडमिन्टन, टेवलटेनिस, कराँते, भारत्तोलन, बक्सिङ, उसु, तेक्वान्दो, खो खो, बुद्धिचाल, कुस्ती लगायतका खेलहरुका लागि खेलाडीहरु छनोट भएका छन् । छनोट प्रतियोगिता कैलाली र कञ्चनपुरमा सञ्चालन भएको हो ।

सुदूरपश्चिम प्रदेश खेलकुद परिषद्ले नवौं राष्ट्रिय खेलकुद प्रतियोगिताको छनोटमा सहभागी हुने खेलाडीलाई दैनिक २ हजारका दरले भत्ता दिएको छ । प्रदेश स्तरीय छनोट प्रतियोगितामा झण्डै तीन हजार खेलाडीहरुले सहभागीता जनाएका थिए ।

उनीहरुबाट नवौं राष्ट्रिय खेलकुद प्रतियोगिताका लागि सुदुरपश्चिमबाट झण्डै ७ सय खेलाडी छनोट भएका छन् ।

गण्डकी प्रदेशमा हुने नवौं राष्ट्रिय खेलकुदमा खेलाइने ३६ मध्ये ३३ खेलमा सुदूरपश्चिमले भाग लिदैछ ।

राष्ट्रिय खेलकुद परिषद्को आयोजनामा नवौं राष्ट्रिय खेलकुद प्रतियोगिता आगामी असोज २८ देखि कात्तिक ३ गतेसम्म गण्डकी प्रदेशको पोखरामा हुँदैछ ।