हेटौडामा ट्रफी टूरको टोलीलाई भब्य स्वागत

काठमाडौं । नवौं राष्ट्रिय खेलकुद प्रतियोगिताको 'ट्रफी टूर' बागमती प्रदेशको हेटौडा पुगेको छ । गण्डकी प्रदेशमा हुने नवौं राष्ट्रिय प्रतियोगिताको ट्रफी टूर सुदूरपश्चिमबाट सुरु भएर बागमती प्रदेशको राजधानी हेटौडा पुगेको हो । 

ट्रफी टूरमा सहभागी खेलाडीलाई हेटौडामा भब्य स्वागत गरिएको छ । प्रदेश मुख्य मन्त्री राजेन्द्र पाण्डे सहित क्याबिनेटका अधिकांश मन्त्रीको उपस्थितीमा ओलम्पियन दिपक विष्ट नेतृत्वको ट्रफी टूरका सदस्यलाई स्वागत गरिएको हो । 

स्वागत कार्यक्रममा मुख्य मन्त्री पाण्डेले प्रदेश सरकार खेलकुद मैत्री रहेको उल्लेख गर्दै खेलाडीको हितमा प्रदेश सरकारले केही दिनभित्र निर्णय गर्ने बताए । बागमती प्रदेश सरकारले नवौं राष्ट्रिय खेलकुदमा स्वर्ण पदक जित्ने प्रदेशका खेलाडीलाई मासिक ६ हजार भत्ता दिने ऐतिहासिक घोषणा गरेको छ । 

सुदूरपश्चिमको धनगढीबाट सूरु भएको ट्रफी टूर लुम्बिनी प्रदेशको रुपन्देही हुँदै बागमती प्रदेशको हेटौडा पुगेको छ ।ट्रफीलाई मधेश प्रदेश, प्रदेश १ र कर्णाली प्रदेश, नेपाली सेना, नेपाल प्रहरी, सशस्त्र प्रहरी बल र एनआरएनएको मुख्यालयमा लगिने छ । ट्रफीलाई अन्तिममा राष्ट्रिय खेलकुदको मुख्य आयोजनास्थल पोखरामा पु¥याइने छ ।

राष्ट्रिय खेलकुदको माहोल बनाउन राखेपले पहिलो पटक ट्रफी टूर कार्यक्रमको सुरुवात गरेको हो  ।  

ट्रफी टुर कार्यदलमा ओलम्पियन दीपक विष्ट, दक्षिण एसियाली खेलकुदका दोहोरो स्वर्ण विजेता करातेका दीपक श्रेष्ठ, नेपालको राष्ट्रिय खेल भलिबलको महिला टिमकी कप्तान अरुणा शाही र अल्ट्रा म्याराथन धाविका मिरा राई सहभागी छन् । 

ट्रफीको भदौ ३१ गते राष्ट्रिय खेलकुद परिषद्का संरक्षक प्रधामन्त्री शेरबहादुर देउवाले सार्वजनिक गरेका थिए ।

राष्ट्रिय खेलकुदको च्याम्पियन ट्रफि प्रर्दशनका अवसरमा बागमती प्रदेशका आर्थिक मामिला तथा योजना मन्त्री शालिकराम जम्कट्टेल, आन्तरिक मामिला तथा कानून मन्त्री कृष्णप्रसाद शर्मा, खानेपानी उर्जा तथा सिंचाई मन्त्री बसन्तप्रसाद मान्नधर, श्रम रोजगार तथा यातायात मन्त्री घनश्याम दाहाल, वन तथा वातावरण मन्त्री विशाल खड्का, युवा तथा खेलकुद मन्त्री रत्न प्रसाद ढकाल, कृषी तथा पशुपंक्षी विकास मन्त्री बसुन्धरा हुमागाई, भूमि व्यवस्था, सहकारी तथा गरिवी निवारण मन्त्री बलराम पौडेल, प्रदेश खेलकुद विकास परिषद् बागमती प्रदेशका सदस्य–सचिव सूर्यलाल भण्डारी, खेलाडी, प्रशिक्षक लगायतको उपस्थिति रहेको थियो ।

राष्ट्रिय खेलकुद परिषद्ले राष्ट्रिय खेलकुदका लागि पहिलो पटक रनिङ ट्रफी निर्माण गरेको हो । ट्रफीको मुल्य १० लाख रुपैयाँ रहेको छ ।