काठमाडौं । कुनै दिन यस्तो पनि आउने छ भने विश्वास पनि गर्न सकिन्न । फ्रान्सबाट आइरहेको समाचारलाई पत्याउने हो भने पेरिस सेन्ट जर्मेन (पीएसजी) ले मन बनाइसकेको छ, लियोनल मेस्सीबाट टाढा रहने । अर्को सिजनका लागि पीएसजी अबदेखि नै टिम बनाउने प्रयासमा छ र त्यस योजनामा छैनन्, यिनै मेस्सी ।
पीएसजीले जे जस्तो सोचेर मेस्सीलाई पेरिस ल्याएको थियो, त्यस्तो केही पनि भएन् । उनी जत्तिको खेलाडीले यो सिजन जसरी बिताएका छन्, त्यसलाई ठाडै नराम्रो भन्न सकिन्छ । मेस्सीले फ्रान्सेली घरेलु फुटबलमा जम्मा जम्मी तीन गोल गरेका छन् । अनि युरोपेली च्याम्पियन्स लिगमा पनि केही गर्न सकेनन् । रियल म्याड्रिडविरुद्ध नकआउट चरणको खेलमा यिनै मेस्सी पेनाल्टीबाट गोल गर्न पनि चुके ।
मेस्सीले सन् २०२१ का लागि बेलन डे अर अवार्ड त जिते, तर यो सिजन उनको प्रदर्शन त्यसलाई न्याय गर्ने खालको रहेन् । फेरि कुरा त के पनि छ भने मेस्सी आफै पेरिसमा खुसी छैनन् । क्लब आफैमा भन्दा पनि उनलाई पेरिस सहर र यसको रहन सहन मन परेको छैन् । यो भनेको त पीएसजी मेस्सीसँग खुसी छैनन्, मेस्सी पेरिससँग खुसी छैनन् भन्ने नै त हो ।
यो समाचारका यी सबै आधार फ्रान्सेली पत्रिकाले स्रोत नभनेर नै लेखेका हुन् । तर यसअघि पनि यस्तै स्रोत भनेर आएका समाचार अन्ततः केही समयपछि सत्य पनि भएका छन् । त्यसैले हुन सक्छ, अर्को सिजन मेस्सी पीएसजीमा हुने छैनन् । एउटा तथ्य के हो भने फुटबल आफै पनि अरू सबै जस्तै अनित्य नै छ ।
–मिररको सहयोगमा ।
