काठमाडौं । नेपाली राष्ट्रिय फुटबल टोलीका युवा विंगर मनिष डाँगीले एएफसी एसियन कप छनोट अघिको कतार भ्रमणले नेपाली टोलीलाई उत्कृष्ट प्रदर्शनका लागि सहयोग पुग्ने बताएका छन् ।
अखिल नेपाल फुटबल संघ (एन्फा) सँग कुरा गर्दै मनिषले कतारको प्रशिक्षण र मैत्रीपूर्णले टोलीलाई धेरै सहयोग पुग्ने बताएका हुन् ।
कुवेतमा आयोजना हुने एएफसी एसियन कप छनोटको लागि नेपाली टोलीले कतारमा तयारी गर्नेछ । यस्तै अफगानिस्तानसँग दुई मैत्रीपूर्ण खेल खेल्नेछ ।
'क्याम्पको लागि कतार जादैछौँ । मैत्रीपूर्ण खेल पनि खेल्दैछौँ । त्यहाँको मौषम र मैत्रीपूर्णसँग एडजस्ट हुँदा हामीलाई सहज हुन्छ जस्तो लाग्छ । किनकी कुवेतको मौषम उस्तै छ । अफगानिस्तान पनि कठिन टिम भएकोले हामीलाई सहयोग हुन्छ,' मनिषले भनेका छन् ।
दोहामा हुने अफगानिस्तानविरुद्धको मैत्रीपूर्ण खेल जेठ ११ र १५ गते हुनेछ । मैत्रीपूर्णपछि कतारबाट नेपाली टोली कुवेत जाने छन् ।
छनोटका लागि नेपाली टोलीले गत साताबाट तयारी सुरु गरिसकेको छ । मनिषले टोलीले अहिले फिटनेसमा केन्द्रित भएर काम गरिरहेको बताए ।
'फिटनेसमा फोकस गरिरहेका छ । लिग सकिएपछि लामो समय विश्राम भएछ । हाम्रो ग्रुपमा एकदम कठिन टिमहरु भएकाले फिटनेसमा ध्यान दिईरहेका छौँ,' मनिषले थपे ।
छनोटमा नेपाल समूह 'ए' मा रहेको छ । यस समूहमा कुवेत, इन्डोनेसिया र जोर्डन रहेका छन् ।
यस समूहबाट नेपालको छनोट हुने सम्भावना न्यून रहेको छ । मुख्य प्रशिक्षक अब्दुल्लाह अल्मुताईरीले नेपाली टोलीले एएफसी एसियन कपमा स्थान बनाउन नसक्ने बताईसकेका छन् ।
छनोट खेलहरु जुन ८ देखि १४ सम्म हुनेछ । नेपालले जुन ८ मा जोर्डनसँग खेल्दै छनोटको सुरुआत गर्नेछ ।
दोस्रो खेलमा नेपालले जुन ११ मा कुवेतको सामना गर्नेछ । नेपालले जुन १४ मा इन्डोनेसियाविरुद्ध खेल्नेछ ।
छनोटबाट समूहको शीर्ष टोली चीनमा आयोजना हुने एसियन कप २०२३ मा छनोट हुने छन् । यस्तै ५ समूहको उत्कृष्ट दोस्रो टोलीले समेत चीनको टिकट पक्का गर्नेछ ।
