एसियन कपमा छनोट हुने कोशिशमा छौँ - विशाल  

काठमाडौं । नेपाली राष्ट्रिय फुटबल टोलीका मिडफिल्डर विशाल राईले चीनमा आयोजना हुने एएफसी एसियन कपमा छनोट हुने कोशिश गरिरहेको बताएका छन् ।

अखिल नेपाल फुटबल संघ (एन्फा) सँग कुरा गर्दै मिडफिल्डर विशालले एसियन कपमा छनोट हुन कोशिश गरिरहेको बताएका हुन्  ।

विशालले कुवेतमा आयोजना हुने एएफसी एसियन कप छनोटका लागि टिमको तयारी राम्रो भईरहेको समेत बताए ।

'ट्रेनिङ सुरु भएको छ । ट्रेनिङ राम्रो भईरहेको छ । कोचले फिटनेसमा ध्यान दिनु भएको छ,' विशालले भने, 'यस पटक हाम्रो ग्रुपमा इन्डोनेसिया, जोर्डन र कुवेत रहेको छ । कुवेत र जोर्डनसँग हामीले दोस्रो चरणमा खेलिसकेका छौँ । इन्डोनेसिया नयाँ टिम हो हाम्रो लागि ।  यो पटक राम्रो खेल्ने हाम्रो योजना छ । हामी सकेसम्म एसियन कपमा छनोट हुने कोशिश गरिरहेका हौँ ।'

छनोटमा नेपाल  समूह 'ए' मा रहेको छ । यस समूहमा कुवेत, इन्डोनेसिया र जोर्डन रहेका छन् ।

यस समूहबाट नेपालको छनोट हुने सम्भावना न्यून रहेको छ । मुख्य प्रशिक्षक अब्दुल्लाह अल्मुताईरीले नेपाली टोलीले एएफसी एसियन कपमा स्थान बनाउन नसक्ने बताईसकेका छन् ।

छनोट अघि नेपालले अफगानिस्तानसँग दुई मैत्रीपूर्ण खेल खेल्नेछ ।

नेपाली टोलीले कतारमा दुई मैत्रीपूर्ण खेल खेल्नेछ ।  दोहामा हुने मैत्रीपूर्ण खेल जेठ ११ र १५ गते हुनेछ ।

विशालले छनोट अघिको मैत्रीपूर्णले टोलीलाई सहयोग पुग्ने समेत बताए ।

'हामीलाई अफगानिस्तानसँगको मैत्रीपूर्णले धेरै सहयोग गर्छ,' उनले थपे ।

 छनोट खेलहरु जुन ८ देखि १४ सम्म हुनेछ । नेपालले जुन ८ मा जोर्डनसँग खेल्दै छनोटको सुरुआत गर्नेछ ।

दोस्रो खेलमा नेपालले जुन ११ मा कुवेतको सामना गर्नेछ । नेपालले जुन १४ मा इन्डोनेसियाविरुद्ध खेल्नेछ ।

छनोटबाट समूहको शीर्ष टोली चीनमा आयोजना हुने एसियन कप २०२३ मा छनोट हुने छन् । यस्तै ५ समूहको उत्कृष्ट दोस्रो टोलीले समेत चीनको टिकट पक्का गर्नेछ ।