काठमाडौं । रोमेलु लुकाकुले आफ्नो चेल्सी करियर कायम राख्ने हो भने उनीसँग छ साताको समय मात्र छ । यस्तो चेतावनीको भाषा सबैले किन बोल्न थालेका छन् भने चेल्सीले क्रिस्टल प्यालेसलाई हराएको एफएकप सेमिफाइनल खेलमा लुकाकुको प्रदर्शन फेरि एकपल्ट कमजोर मात्र होइन्, अति कमजोर रह्यो ।
खासमा उनी इंग्लिस फुटबलकै दोस्रो महँगो खेलाडी हुन्, ज्याक ग्रेलिसपछि । उनलाई किन्न चेल्सीले इन्टर मिलानलाई ९ करोड ८० लाख पाउन्ड तिरेको थियो । तर यत्तिको खेलाडीको प्रदर्शन किन हो, पटक्कै दमदार रहेन् । पछिल्लो दुई महिनादेखि उनले चेल्सीका लागि प्रिमियर लिगमा सुरुदेखि खेलेका छैनन् ।
च्याम्पियन्स लिगमा पनि उनको प्रयोग सब्टिच्युट खेलाडीका रूपमा मात्र भइरहेको छ । सन् २०२२ मा उनले लिगमा कुनै गोल पनि गरेका पनि छैनन् । एफएकपका जति गोल छन्, ती सबै तल्लो डिभिजनका कमजोर टिमविरुद्ध मात्र रहेको छ । प्यालेसविरुद्ध वेम्बलीको खेलमा पनि उनले अन्त्यतिर मात्र सब्टिच्युका रूपमा खेल्न पाए ।
यस्तो किन भइरहेको छ त ? यसको कारण त्यही सेमिफाइनल जितपछि प्रशिक्षक थोमस टुचेलले खुलाएका छन् । उनले भनेका छन्, ‘लुकाकु फिट नै छैनन्, खेल्न । उनी ९० मिनेट टिक्न सक्ने खेलाडी रहेका छैनन् । उनलाई चोटले पिरोलिरहेको छ, त्यसैले फिटनेस केही पनि छैन् ।’ त्यसैले त सबैले भन्न थालेको हो, रामेलु लुकाकुले आफ्नो चेल्सी करियर कायम राख्ने हो भने उनीसँग छ साताको समय मात्र छ ।
त्यो भनेको यही सिजनको अन्त्यसम्म मात्र ।
–मिररको सहयोगमा ।
