एएफसी एसियन कप छनोट : उत्कृष्ट प्रदर्शनको आशा

काठमाडौं । नेपाली राष्ट्रिय फुटबल टोलीले कुवेतमा आयोजना हुने एएफसी एसियन कप छनोटमा सहभागिता जनाउदैछ । आगामी जुनमा आयोजना हुने छनोटका लागि नेपाली टोलीले प्रशिक्षण सुरु गरिसकेका छन् ।

कठिन मानिएको समूहमा रहेको नेपालले छनोटमा उत्कृष्ट प्रदर्शनको आशा राखेको छ । नेपाली टोलीले यस छनोटलाई महत्वपूर्ण प्रतियोगिताको रुपमा लिएको छ ।

नेपाली टोलीका उपकप्तान रोहित चन्दले छनोटमा उत्कृष्ट प्रदर्शन गर्नका लागि योजनाबद्द तरिकाले तयारी गरिरहेको बताउछन् ।

'ट्रेनिङ हिजोबाट सुरु भयो । हाम्रो फोकस एसियन छनोटमा छ । राम्रो योजनाहरु भएको छ । त्यहिँ हिसाबले गैरहेका छौँ,' शनिबार संचारकर्मीसँग कुरा गर्दै रोहितले भने, 'खेलाडीको रुपमा जुनैपनि प्रतियोगिता महत्वपूर्ण हुन्छ । अन्य प्रतियोगिता जस्तै यो पनि हाम्रो लागि महत्वपूर्ण छ । महत्वपूर्ण प्रतियोगिताको रुपमा लिएका छौँ । माथिल्लो स्तरमा जानु छ भने हामीले बलियो टिमसँग प्रतिस्पर्धा गर्न सक्नु पर्छ ।' 

छनोटमा नेपाल  समूह 'ए' मा रहेको छ । यस समूहमा कुवेत, इन्डोनेसिया र जोर्डन रहेका छन् ।

यस समूहबाट नेपालको छनोट हुने संभवाना न्यून रहेको छ । मुख्य प्रशिक्षक अब्दुल्लाह अल्मुताईरीले नेपाली टोलीले एएफसी एसियन कपमा स्थान बनाउन नसक्ने बताईसकेका छन् ।

छनोटको सम्भावना कम भएपनि छनोटमा उत्कृष्ट प्रदर्शनका लागि नेपाली टोली तयार रहेको चन्दले बताए ।

'प्रशिक्षकले दुई पाटोमा बोल्नु भएको छ । हामी कोचिङ पाटोमा सोचिरहेका छौँ । त्यहिँ हो प्रशिक्षकले भने अनुसार हाम्रो सम्भावना एकदमै कम छ तर हामीले हाम्रो सक्ने ट्राइ गर्ने हो । हामीले हाम्रो बेस्ट दिने हो त्यसको तयारीमा छौँ । आशा छ हामीले राम्रो गर्छौ,' चन्दले भने ।

छनोट खेलहरु जुन ८ देखि १४ सम्म हुनेछ । नेपालले जुन ८ मा जोर्डनसँग खेल्दै छनोटको सुरुआत गर्नेछ ।

दोस्रो खेलमा नेपालले जुन ११ मा कुवेतको सामना गर्नेछ । नेपालले जुन १४ मा इन्डोनेसियाविरुद्ध खेल्नेछ ।

नेपाली टोलीका नियमित सदस्य सुजल श्रेष्ठ भने टोलीको लक्ष्य एसियन कपमा छनोट हुने रहेको दाबी गर्छन । उनले छनोटमा गर्व गर्न लायक प्रदर्शन गर्ने बताए ।

'यो टिम सक्षम छ । युवा र सिनियरको मिश्रित भएर टिम राम्रो देखिन्छ । हिजोबाट ट्रेनिङ सुरु भएको छ । दुई दिन राम्रो भएको छ र पछि राम्रो हुने आशा छ,' सुजलले भने, 'प्रशिक्षकले हिजो भनेका कुरा हामीले पढ्यौं । तर, खेलाडी र प्रशिक्षकको मनमा एउटा लक्ष्य छ । हाम्रो टिम राष्ट्रलाई गर्व बनाउने ठाउँ बनाउदै छौँ  । प्रशिक्षकले छनोट हुन्नौ भन्नु भएको छ तर मनमा हाम्रो लक्ष्य छनोट हुने नैछ । देशको लागि गर्व गर्न लायक खेल प्रस्तुत गर्छौ ।'

सुजलले प्रशिक्षकको अभिव्यक्तिले टोलीलाई कुनैपनि नकारात्मक असर नगरेको बताए ।  उनले छनोटमा पहिले जस्तै दबाबरहित तरिकाले खेल्ने बताए ।

'हिजोको कुराले हामीलाई केहिपनि असर परेको छैन । टिममा पनि कुरा भएको छैन । पहिले पनि स्वतन्त्र रुपमा खेल्थ्यौं । अहिले पनि स्वतन्त्र खेल्छौं,' सुजलले थपे ।

सुजलले छनोटमा आफुहरु पुरानो नतिजामा केन्द्रित नहुने समेत बताए ।

'हाम्रो समूह ग्रुप अफ डेथ टाइपको छ । सबैले देखि हाल्नु भएको छ । इतिहासमा हामी कुवेत जोर्डनसँग पराजित भएका छौँ,' सुजल भन्छन्, 'तर हाम्रो लक्ष्य पहिलेको नतिजालाई हेरर नभई टिमलाई कसरि अघि बढाउने र मजबुत बनाउन सक्छौं त्यसमा सोचिरहेका छौँ ।'

छनोटबाट समूहको शीर्ष टोली चीनमा आयोजना हुने एसियन कप २०२३ मा छनोट हुने छन् । यस्तै ५ समूहको उत्कृष्ट दोस्रो टोलीले समेत चीनको टिकट पक्का गर्नेछ ।