दुर्घटनामा गम्भीर घाइते कोलम्बियाका पूर्व कप्तानको निधन

काठमाडौं । कोलम्बिया फुटबल टिमका पूर्व कप्तान फ्रेडी रिनकोनको निधन भएको छ ।

कार दुर्घटनामा परेर गम्भीर घाइते भएका रिनकोनको बिहीबार निधन भएको हो ।

कोलम्बियाको कालीमा भएको कार दुर्घटनामा उनले टाउकोको गम्भीर चोट बोकेका थिए ।

तर, उपचारको क्रममा उनको निधन भएको बीबीसीले जनाएको छ ।

रिनकोनले चलाएको कारलाई बसले ठक्कर दिएको थियो । उनीसँगै कारमा अन्य चार जना सवार थिए ।

बस चालक र बसमा सवार मानिसहरु समेत घाइते भएको बताईएको छ ।

रियल मड्रिडका पूर्व मिडफिल्डर रिनकोनले कोलम्बियाका लागि १७ गोल गरेका थिए ।

रिनकोनले कोलम्बियाबाट तीन पटक विश्वकप खेलेका थिए ।

उनले इटालियन क्लब नापोलीबाट समेत खेलेका थिए ।