काठमाडौं । दिपेन्द्र सिंह ऐरीले आक्रामक शतकीय इनिङ खेलेपछि नेपालले मलेसियालाई जितका लागि २ सय २४ रनको लक्ष्य प्रस्तुत गरेको छ ।
त्रिकोणात्मक टी-ट्वान्टी सिरिज अन्तर्गत त्रिवि क्रिकेट मैदानमा नेपालले २० ओभर ५ विकेट गुएर २ सय २३ रन बनायो ।
नेपालको ठुलो स्कोरमा दिपेन्द्रले अविजित रहदै १ सय १० रनको इनिङ खेले । उनले ५७ बलमा १० चौका र ६ छक्का प्रहार गरे । टी-ट्वान्टी अन्तराष्ट्रियमा दिपेन्द्रको यो पहिलो शतक हो ।
दिपेन्द्र टी-ट्वान्टी अन्तर्राष्ट्रिय क्रिकेटमा शतक बनाउने नेपालका चौथो खेलाडी बने । यस्तै दिपेन्द्र टी-ट्वान्टी अन्तर्राष्ट्रिय क्रिकेटमा र एकदिवसीय अन्तर्राष्ट्रिय क्रिकेटमा शतक पूरा गर्ने दोस्रो नेपाली खेलाडी बनेका छन् ।
यस्तै रोहित पौडेलले टी-ट्वान्टी अन्तर्राष्ट्रिय क्रिकेटमा आफ्नो पहिलो अर्धशतक पूरा गरे । रोहितले ३४ बलमा ५ चौकाको मद्दतमा ५१ रन बनाए । ओपनर कुशल भुर्तेल २ चौकाको मद्दतमा १२ रनमा आउट हुँदा आसिफ शेखले ३ चौका प्रहार गर्दै १८ रन बनाएर पेभिलियन फर्किए ।
आदील अन्सारी ९ बलमा १ छक्का प्रहार गर्दै अन्तिम बलमा १४ रन जोडेर रन आउट भए ।
मलेसियाका मुहमद वाफिक, पवनदीप सिंह, स्याज्रुल इद्रुस र मुहमद अमिरले १/१ विकेट लिए ।
नेपाल सिरिजको फाइनल पुगिसकेको छ । अघिल्लो ३ खेलमा ३ जित हात पार्दै नेपाल फाइनल पुगेको हो । मलेसिया भने ३ खेलमा १ जित निकाल्दा फाइनलको लागि संघर्षरत छ । मलेसियालाई फाइनल पुग्न आजको खेल जित्नुको विकल्प छैन ।
-1751593454.webp)
