विरगञ्जले धोका दिएको सुनिलको आरोप 

काठमाडौं । राष्ट्रिय फुटबल टिमका सदस्य सुनिल बलले फ्रेन्चाईज फुटबल क्लब विरगञ्ज युनाईटेडले आफुलाई धोका दिएको आरोप लगाएका छन् । मार्की खेलाडीको रुपमा आफुलाई पक्का गरेर अन्तिम समयमा क्लबले आफुलाई धोका दिएको सुनिलको गुनासो छ । 

फ्रेन्चाईज फुटबल नेपाल सुपर लिग (एनएसएल)मा विरगञ्ज युनाईटेड यस सिजनको नयाँ टिम हो । नयाँ सिजनका लागि थपिएका तीन टिममा प्रदेश नम्बर दुईको विरगञ्ज अक्सनमा छनोट हुने तेस्रो टिम बनेको थियो । विरगञ्जले घरेलु लिग संरचनामा बी डिभिजन लिग समेत खेलिरहेको छ । 

‘सुरुमा ढुक्कसँग बस्न भन्यो । अहिले अन्तिम दिनमा आएर हुदैन भन्छ । यसले गर्दा नराम्रो लाग्यो । यो घटना अरु खेलाडीलाई नहोला भन्ने छैन ।’ सुनिलले खेलपाटीसँग भने, ‘अरुलाई यस्तो नहोस भन्ने हो । दुई सय प्रतिशत पक्का भनेर अन्तिममा धोका दिने काम भएको छ ।’

‘क्लबको कुरा अनुसार तयारी गरेको थिए । अक्सनको लिस्ट बनाएको थिए ।’ सुनिलले भने, ‘अन्तिम दिनमा आएर क्लबले सकिन भनेको छ । एन्फाको दबाबका कारण अरुनै खेलाडी लिनुपर्ने भयो भनेर जवाफ दिएको छ ।’ 

सुनिल राष्ट्रिय फुटबल टिमका महत्वपुर्ण सदस्य हुन् । उनी भर्खरै सकिएको ए डिभिजन लिगका सर्वोत्कृष्ट खेलाडी हुन् । उनकै प्रेरणादायी प्रर्दशनका आधारमा मछिन्द्र क्लबले यस सिजनको लिग उपाधि रक्षा गर्न सफल भएको थियो । 

विरगञ्ज युनाईटेडका रमेश श्रेष्ठले सुनिललाई लिनेबारे क्लबमा छलफल चलेको मात्र बताए । 

‘भेट्छु भनेर पक्का गरेको हो । लिने भनेर कुरा मात्र चलेको हो ।’ सुनिलसँग संवादमा रहेका उनले भने, ‘सुनिललाई कसरी क्लबमा समेट्ने भनेर मिलाउने प्रयास गर्दैछौं । मार्कीमा भएन, अन्त कतै मिलाएर हेर्छौ ।’