काठमाडौं । नेपाल सुपर लिग (एनएसएल) को साविक विजेता टिम काठमाडौं रेजर्सले बाल गोलपाल महर्जनलाई मुख्य प्रशिक्षकमा नियुक्त गरेको छ ।
ललितपुरमा बिहीबार पत्रकार सम्मेलनको आयोजना गर्दै काठमाडौंले दोस्रो संस्करणका लागि महर्जनलाई मुख्य प्रशिक्षक नियुक्त गरिएको जनाएको हो ।
यस्तै काठमाडौंले मार्की खेलाडीमा राष्ट्रिय टोलीका गोलरक्षक विकेश कुथुलाई अनुबन्ध गरेको छ ।
काठमाडौंका डिरेक्टर विज्ञानराज शर्माले मुख्य प्रशिक्षक महर्जन र मार्की खेलाडी कुथुसँग सम्झौता पत्रमा हस्ताक्षर गरे।
पहिलो संस्करणको उपाधि काठमाडौंले जित्दा विकेश कप्तान र बाल गोपाल नै मुख्य प्रशिक्षक रहेका थिए ।
सम्झौतापछि बोल्दै विकेशले दोस्रो पटक मार्की खेलाडीको रुपमा अनुबन्ध हुँदा खुशी लागेको बताए । उनले उपाधि रक्षाको लागि मेहेनत गर्ने बताए ।
'मार्की खेलाडीको रुपमा फेरि अनुबन्ध हुँदा खुशी लागेको छ । यस पटक पनि एकताका साथ उपाधि रक्षाका लागि खेल्ने छौँ । उपाधि घरमा ल्याउने छौँ,' विकेशले भने, 'राम्रो नेतृत्व गर्ने र राम्रो खेल पस्कने वाचा गर्छु ।'
मुख्य प्रशिक्षक महर्जनले फेरि उपाधि जित्ने योजना रहेको बताए।
'अघिल्लो वर्ष झैँ हामीले उपाधि जित्ने योजना बनाएका छौँ । अघिल्लो पटकको उपाधि श्रेय टिम म्यानेजमेन्ट र खेलाडीलाई जान्छ,' महर्जनले भने ।
काठमाडौंका डिरेक्टर शर्माले यस पटक पनि उपाधि जित्ने प्रयास रहेको बताए ।
'यस पटक पनि उपाधि जित्ने योजना अनुसार अघि बढेका छौँ । उपाधि घरमा ल्याउन सक्छौं,' शर्माले भने ।
काठमाडौंका मालिक तथा मोरङ अटो वर्कशपका एमडी विष्णु कुमार अग्रवालले टोलीलाई राम्रो बनाउन चरणबद्ध तरिकाले अघि बढ्ने बताए ।
'हामी चरणबद्ध तरिकाले अघि बढिरहेका छौँ । हामीले करोड खर्च गरेर टिम बनायौं यो पहिलो चरण हो,' उनले भने, 'कोभिडले गर्दा पहिलो पटक असर गर्यो । भौतिक पूर्वाधारका बारेमा असर गर्यो । एनएसएलको भविष्य राम्रो छ ।'
एनएसएलको दोस्रो संस्करण चैत २६ देखि जेठ ७ गतेसम्म आयोजना हुनेछ ।
दोस्रो संस्करणको प्रतियोगिता दुई शहरमा आयोजना हुनेछ । प्रतियोगिताका खेलहरु पोखरा र काठमाडौंमा हुनेछ ।
पहिलो संस्करण दशरथ रंगशालामा आयोजना भएको थियो । पहिलो संस्करणमा ७ टोलीले प्रतिस्पर्धा गरेका थिए ।
-1752678405.JPG)
-1752667918.png)
