बार्सिलोनाको फराकिलो जित

काठमाडौं । स्पेनिस ला लिगा फुटबलमा बार्सिलोनाले एथ्लेटिक बिल्बाओलाई हराएको छ ।

आइतबार राति भएको खेलमा बार्सिलोनाले बिल्बाओलाई ४-० गोल अन्तरले हराएको हो ।

घरेलु मैदानमा खेलको ३७ औं मिनेटमा पिएरे एमरिक अबमेयाङले गोल गर्दै बार्सिलोनालाई सुरुआती अग्रता दिलाएका थिए ।

खेलको ७३ औं मिनेटमा ओसुमाने डेम्बेलेले गोल गर्दै बार्सिलोनालाई २-० को अग्रता दिलाए ।

लुक डी योङले ९० औं मिनेटमा गोल गर्दा बार्सिलोनाको अग्रता तेब्बर बन्यो ।

त्यसपछि खेलको इन्जुरी समयमा मेम्फिस डीपेले गोल गर्दै बार्सिलोनालाई ४-० को जित दिलाए ।

जितसँगै बार्सिलोनाले २५ खेलमा ४५ अंक जोडेको छ ।

बार्सिलोना लिगको चौंथो स्थानमा उक्लिएको छ ।

बिल्बाओ ३७ अंक जोडेर आठौं स्थानमा रहेको छ ।