न्यूजिल्यान्डले पाकिस्तानको भ्रमण गर्ने 

काठमाडौं । न्यूजिल्यान्डले सन् २०२२ को डिसेम्बरदेखि २०२३ को जनवरीसम्म टेस्ट र एकदिवसिय क्रिकेट सिरिजका लागि पाकिस्तानको भ्रमण गर्ने भएको छ । 

पाकिस्तान क्रिकेट बोर्डले जनाए अनुसार फ्यूचर टुर्स प्रोग्राम अन्तर्गत न्यूजिल्यान्डले दुई टेस्ट र तीन एकदिवसिय खेलका लागि पाकिस्तानको भ्रमण गर्नेछ ।

टेस्ट सिरिज विश्व टेस्ट च्याम्पियनसिप तथा एकदिवसिय सिरिज विश्वकप सुपर लिग अन्तर्गतको हुनेछ ।  

यसका साथै गत सेप्टेम्बरमा पाकिस्तानको भ्रमण रद्द गरेको क्षतिपूर्ति स्वरुप न्यूजिल्यान्डले २०२३ को अप्रिलमा टी–ट्वान्टी र एकदिवसिय सिरिजका लागि पाकिस्तानको भ्रमण गर्नेछ । 

अप्रिलमा न्यूजिल्यान्डले पाकिस्तानविरुद्ध ५ वटा टी–ट्वान्टी र सोही संख्यामा एकदिवसिय खेल खेल्नेछ । 

गत सेप्टेम्बरमा सुरक्षा चुनौती भन्दै न्यूजिल्यान्डले पाकिस्तानको भ्रमण रद्द गरेको थियो ।