कर्णालीमाथि प्रदेश एकको शानदार जित

काठमाडौँ । प्रधानमन्त्री कप (पीएम कप) महिला क्रिकेट प्रतियोगिता अन्तर्गत प्रदेश नंं १ ले विजयी सुरुवात गरेको छ । 

उदघाटन खेलमा कर्णाली प्रदेशलाई १ सय ६० रनले पराजित गर्दै प्रदेश नं १ ले शानदार सुरुवात गरेको हो ।  

फाप्ला क्रिकेट मैदानमा १ सय ६६ रनको लक्ष्य पछ्याएको कर्णाली ११ ओभर ४ बलमा मात्र ६ रनमा अलआउट भयो ।

कप्तान आयुषा टन्डनले सर्वाधिक ३ रन बनाउँदा अंशु शाक्य र लक्ष्मी रिमालले समान १–१ रन जोडे । अन्य ८ खेलाडीले खाता समेत खोल्न सकेनन् ।

प्रदेश नं १ की अलिशा खडियाले ५ विकेट हात परेपछि कर्णाली सस्तैमा समेटियो । अलिशाले ४ ओभर बलिङ गर्दै ३ मेडेन ओभर फाल्दै मात्र १ रन खर्चिन् ।

संगीता राईले २ तथा सबनम राईले १ विकेट हात पारिन् । 

यसघि टस जितेर पहिले ब्याटिङ गरेको प्रदेश १ ले निर्धारित २० ओभरमा मात्र २ विकेट गुमाएर १ सय ६६ रन बनायो ।

कप्तान रुबिना क्षेत्रीले १० चौकाको मद्दतले सर्वाधिक ७६ रन जोड्दा अप्सरी बेगमले ६२ बलमा अविजित ६१ रनको योगदान गरिन् ।

कर्णाली प्रदेशकी दिब्या धामीले २ विकेट हात पारिन् ।